पक्षी सप्ताहानिमित्त घुबड संवर्धनासाठी कडगाव येथील कुमार भवनमध्ये चित्र–पोस्टर स्पर्धा

कडगाव (ता. भुदरगड) : कुमार भवन कडगाव येथे पक्षी सप्ताहानिमित्त दरवर्षीप्रमाणे यंदाही घुबड या पर्यावरणपूरक पण अंधश्रद्धेमुळे बदनाम झालेल्या पक्ष्याबाबत जागरूकता निर्माण करण्यासाठी चित्र व पोस्टर स्पर्धेचे आयोजन करण्यात आले. ही स्पर्धा पक्षीमित्र शिक्षक पी. ए. कुंभार यांच्या संकल्पनेतून राबविण्यात आली.

घुबड शेतीसाठी अत्यंत महत्त्वाची भूमिका बजावतात. उंदीरासह पिकांचे नुकसान करणाऱ्या इतर प्राण्यांच्या संख्येवर घुबड नैसर्गिकरीत्या नियंत्रण ठेवतात, परिणामी पिकांचे ४० टक्क्यांपर्यंत नुकसान टाळता येते, असे श्री. कुंभार यांनी सांगितले. वाढती मानवी हस्तक्षेप आणि अधिवास नष्ट होत असल्यामुळे घुबड संवर्धनाची तातडीची गरज असल्याचेही त्यांनी नमूद केले.

स्पर्धेत भारतातील विविध प्रजातींच्या घुबडांचे वैशिष्ट्ये आणि त्यांच्या संवर्धनावर आधारित आकर्षक चित्रे विद्यार्थ्यांनी रेखाटली. एकूण ८० विद्यार्थ्यांनी उत्साहाने सहभाग नोंदविला. शाळेचे मुख्याध्यापक एस. आर. पाटील, कला शिक्षक जी. ए. देसाई तसेच सर्व शिक्षक व शिक्षकेतर कर्मचाऱ्यांचे मार्गदर्शन आणि सहकार्य लाभले.

या स्पर्धेत प्रदर्शित झालेली निवडक चित्रे पिंगोरी, पुणे येथील इला हॅबिटॅट फाउंडेशन आयोजित जागतिक उलूक महोत्सवातील कला प्रदर्शनासाठी पाठविण्यात येणार असून, तीन वर्षातून एकदा होणाऱ्या या महोत्सवात स्थानिक विद्यार्थ्यांच्या कलेला राष्ट्रीय पातळीवर स्थान मिळणार आहे.