पुण्यात ‘कृषिवानिकी व वनशेती, औषधी वनस्पती’ यावर राज्यस्तरीय शेतकरी मेळाव्याचे आयोजन

सावित्रीबाई फुले पुणे विद्यापीठात रंगणार ज्ञानाचा जागर

पुणे: सावित्रीबाई फुले पुणे विद्यापीठातील वनस्पतिशास्त्र विभाग, सामाजिक वनीकरण विभाग (पुणे) आणि पश्चिम विभागीय औषधी वनस्पती सह-सुविधा केंद्र (RCFC-WR) यांच्यावतीने सोमवारी १६ मार्च २०२६ रोजी ‘कृषिवानिकी, वनशेती व औषधी वनस्पती’ या विषयावर एक दिवसीय राज्यस्तरीय शेतकरी प्रशिक्षण आणि क्रेता-विक्रेता मेळाव्याचे आयोजन करण्यात आले आहे. विद्यापीठातील प्रो. टी. एस. महाबळे हॉल येथे हा सोहळा पार पडणार असून, याद्वारे शेती आणि वनसंपदेची सांगड घालून शेतकऱ्यांना आर्थिक समृद्धीचा मार्ग दाखवला जाणार आहे.

सहभागासाठी लिंकवर क्लिक करा –
https://forms.gle/95LDeVKafhrcikSL7

कार्यक्रमाचा प्रारंभ सकाळी ८.३० वाजता नोंदणी व अल्पोपहाराने होईल. सकाळी १० वाजता उद्घाटन समारंभाचे आयोजन करण्यात आले असून, या प्रसंगी सावित्रीबाई फुले पुणे विद्यापीठाचे कुलगुरू सुरेश गोसावी आणि सामाजिक वनीकरण विभागाचे प्रधान मुख्य वनसंरक्षक विवेक खांडेकर यांची प्रमुख उपस्थिती लाभणार आहे. तसेच प्र-कुलगुरू प्रा. पराग काळकर, ज्येष्ठ वनस्पतिशास्त्रज्ञ प्रा. एस. डी. महाजन, सामाजिक वनीकरणाचे अप्पर प्रधान मुख्य वनसंरक्षक श्री. डब्ल्यू. आय. याटबॉन आणि इतर मान्यवर मार्गदर्शन करणार आहेत. या उद्घाटन सत्रातच कृषिवानिकी क्षेत्रात उत्कृष्ट कामगिरी करणाऱ्या मान्यवरांचा विशेष गौरव करण्यात येईल आणि प्रदर्शनीचे उद्घाटनही पार पडेल.

मेळाव्यातील पहिले सत्र कृषिवानिकीच्या संकल्पना आणि त्यातील संधींवर आधारित असेल. यामध्ये प्रा. (डॉ.) दिगंबर मोकाट आणि माजी मुख्य वनसंरक्षक सत्यजित गुजर हे फायदेशीर वनवृक्ष लागवडीवर मार्गदर्शन करतील. उद्योगांच्या दृष्टिकोनातून वनवृक्षांचे महत्त्व स्पष्ट करण्यासाठी जे. के. पेपर्सचे चैतन्य पाटील पेपर उद्योगातील संधींवर भाष्य करतील. तसेच, शेती पूरक व्यवसायांसाठी स्टार्टअप, बँक कर्ज आणि शासकीय योजनांची माहिती महावीर जंगटे यांच्याकडून दिली जाईल.

दुपारच्या सत्रात मधुमक्षिका पालन, रेशीम शेती, आणि चंदन व बांबू यांसारख्या अधिक उत्पादन देणाऱ्या वृक्षांच्या लागवडीवर सविस्तर चर्चा होईल. डॉ. स्वप्नील शिंदे आणि डॉ. अक्षय देशमुख हे तज्ज्ञ सुगंधी व औषधी वनस्पतींची बाजारपेठ याबाबत मार्गदर्शन करतील. या सत्रात केवळ तज्ज्ञांचे मार्गदर्शनच नाही, तर अनुभवी शेतकऱ्यांचे अनुभव आणि त्यांच्या प्रश्नांना उत्तर देण्याची संधीही उपलब्ध करून देण्यात आली आहे. कार्यक्रमाच्या उत्तरार्धात सहभागी शेतकऱ्यांना विद्यापीठातील अग्रो-फॉरेस्टी मॉडेल, डेमो प्लॉट आणि औषधी उद्यानाची प्रत्यक्ष भेट घडवून आणली जाईल. यामुळे शेतकऱ्यांना प्रगत शेतीचे प्रात्यक्षिक अनुभवता येईल. सायंकाळी ६ वाजता या भरगच्च मेळाव्याचा समारोप होईल. शेतीला वनशेतीची जोड देऊन शाश्वत विकास साधू इच्छिणाऱ्या शेतकऱ्यांसाठी हा मेळावा एक महत्त्वाची संधी ठरणार आहे.

अधिक माहितीसाठी संपर्क –
श्री. मंगेश सपकाळ – 9689902268
श्रीमती. सिमा मगर – 9922074150
श्री. मनोज महाजन – 8668569369