स्व. राजाराम डाकवे (तात्या) राज्यस्तरीय पुरस्कार वितरण सोहळा २८ सप्टेंबरला

तळमावले : स्व. राजाराम डाकवे (तात्या) यांच्या चतुर्थ पुण्यस्मरणानिमित्त देण्यात येणाऱ्या राज्यस्तरीय पुरस्कारांचा वितरण सोहळा सोमवार, २८ सप्टेंबर २०२६ रोजी सकाळी १० वाजता डाकेवाडी, पो. काळगाव, ता. पाटण, जि. सातारा येथे आयोजित करण्यात आला आहे. या सोहळ्यात साहित्य, सामाजिक कार्य, वाचन चळवळ आणि शैक्षणिक क्षेत्रातील मान्यवरांसह विद्यार्थी व साहित्यिकांचा गौरव करण्यात येणार आहे.

यंदापासून सुरू करण्यात आलेला स्व. राजाराम डाकवे (तात्या) सामाजिक कृतज्ञता पुरस्कार शिवसमर्थ समूहाचे कुटुंबप्रमुख जनार्दन बोत्रे यांना जाहीर झाला आहे. तसेच न्यू इंग्लिश स्कूल, काळगाव येथे २०२५च्या इयत्ता दहावीच्या परीक्षेत मुलींच्या विभागातून प्रथम क्रमांक मिळवल्याबद्दल कु. सिद्धी विकास काळे हिला एक हजार रुपये रोख, सन्मानपत्र आणि ‘तात्या’ पुस्तक देऊन गौरविण्यात येणार आहे.

१७ साहित्यिकांचा राज्यस्तरीय पुरस्काराने गौरव

राज्यस्तरीय स्व. राजाराम डाकवे (तात्या) साहित्य पुरस्काराच्या चौथ्या वर्षासाठी राज्यभरातील १७ साहित्यिक व त्यांच्या पुस्तकांची निवड करण्यात आली आहे. यामध्ये प्रदीप बडदे यांच्या माणुसकीची अंत्ययात्रा, अमृता खंडेराव यांच्या उलटं टांगलेलं भूत आणि म्हातारी, डॉ. शिवाजी शिंदे यांच्या भावगंधित व्यक्तिमत्त्वे, सदाशिव बर्गे यांच्या शंभरची चिल्लर, तुकाराम कांबळे यांच्या बिंब-प्रतिबिंब, प्रकाश संकपाळ यांच्या कुडपाण, वीणा रारावीकर यांच्या यू हॅपिअर, सत्यवान मंडलिक यांच्या इथे जन्मली माणुसकी, सौ. सुमन चंद्रशेखर यांच्या मायेची पाखर, डॉ. शुभांगी कुंभार यांच्या विचारदीप निबंधमाला, प्रा. पौर्णिमा केरकर यांच्या गोमंतकीय लोकसाहित्य, चुडाराम बल्हारपुरे यांच्या जत्रा घडली नागोबाची, डॉ. स्वाती पाटील यांच्या निळी निळी नव्हाळी, रामभाऊ डुबल यांच्या रामभाऊंच्या चारोळ्या, वसुंधरा निकम यांच्या अक्षरपुष्प, सौ. कांता भोसले यांच्या रानफूल आणि गणेश बर्गे यांच्या लाल दिवा या पुस्तकांचा समावेश आहे.

दोन वाचनालयांना सर्वोत्कृष्ट वाचनालय पुरस्कार

यंदापासून सुरू करण्यात आलेला स्व. राजाराम डाकवे (तात्या) स्मृती सर्वोत्कृष्ट वाचनालय पुरस्कार सैदापूर येथील समाजभूषण बाबुराव गोखले सार्वजनिक ग्रंथालय आणि मालदन येथील युवा साहित्य समाज वाचनालय यांना प्रदान करण्यात येणार आहे.

तात्याश्री दिवाळी अंक स्पर्धेत कोल्हापूर सकाळ दिवाळी अंक – संतुलित मन ( निखिल पंडितराव) , आनंद गंधाली ( डॉ. मधुकर केशव वर्तक ) , दर्यावर्दी ( अमोल सरतांडेल ) आणि चंदगड टाइम्स ( संतोष सावंत भोसले ) हे विजेते ठरले आहेत.

तसेच सातव्या ‘सेल्फी विथ गुढी’ स्पर्धेत सौ. अपूर्वा पाटणकर यांनी प्रथम, सई हर्षदा जयंत कदम यांनी द्वितीय, तर छाया दुर्योधन पारेकर यांनी तृतीय क्रमांक मिळविला आहे. अनुपमा दाभाडे, कविता कचरे, सुनील पवार आणि माधुरी जाधव यांना विशेष प्रावीण्य पुरस्कार जाहीर करण्यात आला आहे. या सर्व पुरस्कारांचे स्वरूप सन्मानचिन्ह, सन्मानपत्र आणि ‘तात्या’ पुस्तक असे आहे.

मान्यवरांची उपस्थिती

या सोहळ्यास महंत अहिल्यागिरीजी महाराज (शिवदत्त मठ, कापुसेवाडी), संभाजीराव पाटणकर (सेवानिवृत्त पोलीस अधिकारी), प्रदीप कांबळे (वक्ते, लेखक, कवी), डॉ. राजेंद्र कंटक (गिनीज बुक रेकॉर्ड होल्डर), विशाल पाटील (सातारा जिल्हा प्रतिनिधी, न्यूज १८ मराठी), अमित देशमुख (उपविभागीय डाक अधिकारी, कराड पूर्व उपविभाग), सानिका माने (इन्स्टाग्राम रील्स स्टार) आदी मान्यवर उपस्थित राहणार आहेत.

सात वर्षांपासून वाचनसंस्कृती रुजविण्याचा उपक्रम

ग्रामीण भागात वाचनसंस्कृती रुजविण्यासाठी डाकवे परिवाराने गेल्या सात वर्षांपासून विविध उपक्रम राबविले आहेत. मान्यवरांचे स्वागत पुस्तकाने करणे, भित्तिचित्र काव्य स्पर्धा, प्रातिनिधिक काव्यसंग्रह प्रकाशन, महिलांना प्रेरणादायी पुस्तकांचे वाटप, कॅलिग्राफीतून अक्षरसंस्कार, दिवाळी अंक स्पर्धा, साहित्य पुरस्कार, ‘वाचन संकल्प महाराष्ट्राचा’ उपक्रमात सहभाग, पुस्तक भेट अभियान, पुस्तकांची आरास, पुस्तकांची गुढी, ग्रंथालयांना पुस्तकांचे वितरण, ‘पुस्तकांचं झाड’, वार्तांकन स्पर्धा, ‘एक अक्षरगणेशा’ संमेलन, स्व. राजाराम डाकवे (तात्या) वाचनालय व ग्रंथालय, वाढदिवसानिमित्त पुस्तक प्रकाशन, वृत्तपत्र विक्रेत्यांचा सन्मान आणि ‘स्पंदन एक्सप्रेस’ मासिकाच्या माध्यमातून वाचकांना व्यासपीठ उपलब्ध करून देणे, असे उपक्रम राबविण्यात आले आहेत. या उपक्रमांना समाजातून चांगला प्रतिसाद मिळत आहे.

भविष्यात वाचनालय व ग्रंथालयाच्या माध्यमातून वृत्तपत्रलेखन, निबंध, चित्रकला व काव्य स्पर्धा, तात्याश्री दिवाळी अंक स्पर्धा, मोफत अभ्यासिका, सांस्कृतिक कार्यक्रम, स्पर्धा परीक्षा मार्गदर्शन शिबिरे, ग्रंथप्रदर्शन, पुस्तक प्रकाशन, तात्याश्री साहित्य पुरस्कार, साहित्य संमेलन, कवी संमेलन आणि पुस्तक भेट अभियान असे विविध उपक्रम राबविण्यात येणार असल्याचे संस्थापक अध्यक्ष संदीप डाकवे यांनी सांगितले.

चतुर्थ पुण्यस्मरणानिमित्त आयोजित कार्यक्रमास मित्रपरिवार, नातेवाईक आणि साहित्यप्रेमींनी मोठ्या संख्येने उपस्थित राहावे, असे आवाहन गयाबाई डाकवे, भरत डाकवे, विठ्ठल डाकवे, विश्वनाथ डाकवे, संदीप डाकवे, प्रथमेश डाकवे, स्पंदन डाकवे आणि समस्त डाकवे परिवाराच्या वतीने करण्यात आले आहे.

वाचनालयासाठी पुस्तके व साहित्य देण्याचे आवाहन

स्व. राजाराम डाकवे (तात्या) वाचनालय व ग्रंथालयाच्या उभारणीसाठी पुस्तके, वर्तमानपत्रे, संगणक, कपाटे आणि फर्निचर अशा भौतिक साहित्याची आवश्यकता आहे. ग्रामीण भागात वाचनसंस्कृती रुजविण्यासाठी सुरू करण्यात आलेला हा उपक्रम अधिक व्यापक करण्यासाठी दानशूर व्यक्ती आणि संस्थांनी वस्तूरूप किंवा आर्थिक स्वरूपात सहकार्य करावे, असे आवाहन संस्थापक अध्यक्ष संदीप डाकवे यांनी केले आहे. सहकार्य करणाऱ्या व्यक्ती व संस्थांना स्पंदन चॅरिटेबल ट्रस्टच्या वतीने सन्मानपूर्वक ई-प्रमाणपत्र देण्यात येणार आहे.

पुरस्कार सोहळ्यास येताना पुस्तक भेट द्यावे

राज्यस्तरीय पुरस्कार वितरण सोहळ्यास उपस्थित राहणाऱ्या पाहुणे आणि साहित्यप्रेमींनी पुष्पगुच्छ किंवा इतर भेटवस्तू आणण्याऐवजी शुभेच्छा म्हणून ग्रंथ व पुस्तके भेट द्यावीत, असे आवाहन करण्यात आले आहे. सोहळ्यात प्राप्त होणारी पुस्तके ग्रामीण भागातील स्व. राजाराम डाकवे (तात्या) वाचनालय व ग्रंथालयाला देण्यात येणार आहेत. या माध्यमातून वाचन चळवळीला बळ मिळणार असून, वाचनसंस्कृती जपण्याच्या या ज्ञानयज्ञात सर्वांनी योगदान द्यावे, असे आवाहन करण्यात आले आहे.