वेगळी वाट चोखाळणारी नवदुर्गा..!..आशा नेगी-हिरेमठ

ओळख: वेगळी वाट चोखाळणाऱ्या नवदुर्गांची..!..आशा नेगी-हिरेमठ

“ब्युटी ऑफ लाईफ या पुस्तकाच प्रयोजनच आहे प्रत्येकाच्या मनातून कॅन्सर” या शब्दाची भीती घालवणे.’ अशा शब्दांत ती सतत बोलत असते. अशा या धाडसी पण शांतपणे कॅन्सर सारख्या मोठ्या आजाराला सकारात्मक दृष्टीने हसतमुखाने इच्छाशक्तीच्या जोरावर सामोरे जाणाऱ्या आधुनिक नवदुर्गा आशाला मानाचा मुजरा…!!

ॲड. शैलजा मोळक
लेखक, कवी, संपादक, प्रकाशक
अध्यक्ष, शिवस्फूर्ती प्रतिष्ठान पुणे
मो. 9823627244

‘नाम ही काफी है !’ असं काही व्यक्तींच्या बाबतीत म्हटलं तर ते चुकीचे ठरत नाही अशापैकी एक आशा नेगी. स्वतःला कॅन्सर होऊन तो मोठ्या धाडसाने पेलून त्यावर मात करून स्वतःचे प्रत्येक दिवसाचे फोटोसेशन करणारी, दैनंदिन डायरी लिहिणारी, नवऱ्याचे सुध्दा अश्रू पुसणारी, त्याला धीर देणारी, आपल्या दोन लहान मुलींना तितक्याच हळुवारपणे त्यांना समजेल अशा शब्दांत आपल्याविषयी सांगणारी, इतकेच नव्हे तर इतर कॅन्सरग्रस्त पेशंटशी संवाद साधणारी व आपली दैनंदिन डायरी इतरांना मार्गदर्शक होईल म्हणून ‘ब्युटी ॲाफ लाईफ’ या नावे प्रकाशित करणारी..जीवनातील एका वळणावर वेगळी वाट चोखाळणारी ही आधुनिक नवदुर्गा..! ‘देव काही जबाबदाऱ्या किंवा कामं अशाच लोकांना देतो ज्यांच्यात त्या पेलण्याची ताकद असते’ हे तिचेच वाक्य. तिचे ब्युटी ॲाफ लाईफ हे पुस्तक चाळताना अशी अनेक सकारात्मक दृष्टीकोन सांगणारी बोल्ड केलेली वाक्ये पानापानावर दिसतात. पाच बहिणी व एक भाऊ अशा मध्यमवर्गीय कुटुंबात पौडी गढवाल, उत्तराखंड मधे कठ्ठू बडा या गावात घरच्या गोठ्यातला जन्म. तिच्या आईने खुरप्याने नाळ कापली. गळ्याला नाळेचे तीन वेढे. ते आईने काढले आणि छातीला मसाज करून श्वास सुरु केला. आईने तिचे नाव कविता ठेवले पण वडीलांना कंपनीतर्फे परदेशात जायची संधी मिळाली म्हणून त्यांनी ‘आशा’ ठेवले. वडील पिंपरी चिंचवड परिसरातील एका कंपनीत कामाला होते म्हणून सारे कुटुंब इथेच वास्तव्यास होते. तिचे सर्व शालेय शिक्षण चिंचवड तर महाविद्यालयीन शिक्षण पुणे व चिंचवड परिसरात झाले. मोठे कुटुंब त्यामुळे जबाबदारी जास्त म्हणून आशाने १० वी नंतरच नोकरी सुरु केली. वयाच्या १८ व्या वर्षी तिचे पितृछत्र हरपले. वडीलांची जागा भरून काढत घराचा ती आधार बनली. आठवड्यात एक दिवस ती कॅालेजात जात होती. तेथेच तिला तिच्या आयुष्याचा जोडीदार भेटला. प्रत्येक कामात त्याने प्रोत्साहन दिले व तिच्या सोबत ते खंबीरपणे उभा राहिला. घरोघरी जाऊन चहापत्ती व साड्या विक्री तिने सुरु केली. महाविद्यालयातच तिला मॅाडेलिंगची संधी आली व तिचे कलाक्षेत्रात पदार्पण झाले. येथे आत्मनिर्भर व जिद्दी आशाचा जन्म झाला. मग मागे वळून न पाहाता तिने एकांकिका व व्यावसायिक नाटक सुरु केले. अनेक नाटकात प्रमुख भूमिका केल्या. गरज म्हणून काही व्यवसाय करत असतानाच आशा एम.कॉम, एम.बी.ए. (HR) झाली. आपल्या क्षमता व जिद्दीवर विश्वास ठेवत तिने प्रत्येक क्षेत्रात यश मिळवले. सौंदर्य स्पर्धेत भाग घेऊन मिस पिंपरी चिंचवड, मिस महाराष्ट्र, मिसेस महाराष्ट्र, मिसेस वेस्ट इंडिया याची विजेती ठरली.

अंगातील कलागुणांच्या जोरावर एका बाईने किती व कोणकोणत्या क्षेत्रात काम करावं हे पाहाता आशा अथकपणे खूप काही करत राहिली. संस्कृती क्रिएशनची स्थापना करून गणेशोत्सवात जिवंत देखावे, नवरात्रीत गरबा, विविध राज्यस्तरीय स्पर्धेत सहभाग, प्रबोधनपर पथनाट्य हे सगळं करत असताना मॅनेजमेंटमधे गोडी निर्माण झाली. आणि ‘आर्ट लेक एंटरटेनमेंट प्रा. लि.’ या इव्हेंट कंपनीचा जन्म झाला. कार्पोरेट इव्हेंट, सेलिब्रिटी मॅनेजमेंट, इलेक्शन मॅनेजमेंट, वेडिंग इ. कामे सुरु झाली. प्रॅाडक्शन हाऊस पण सुरु केले. रियल इस्टेट हा पुरुषप्रधान समजला जाणारा व्यवसाय पण त्यातही आशाने यशस्वी पदार्पण केले. ‘आशियाना लॅन्डमार्क’ ची सुरुवात करून मावळ, पवना, कोकण याठिकाणी ४०/५० एकरचे प्लॅाटिंग केल्याने आर्थिक स्थैर्य तिला मिळाले. स्वप्नातही विचार केला नसताना घर, गाडी, जागा, ॲाफिस या सर्व गोष्टी तिला मिळाल्या.

आरिका १२ वर्ष व आरा ५ वर्षाची. दोन मुली व पतीसह सारं काही नीट चाललं होतं. पण कित्येकदा आयुष्यात जे काही समोर येईल त्याचा हसत हसत स्वीकार करून पुढे मार्गक्रमण करणं हेच प्रत्येकाच्या हातात असतं अगदी तसंच आशाच्या बाबतीत घडलं. सन २०२३ मधे तिला अचानक खर्च स्टेज ब्रेस्ट कॅन्सरला सामोरे जावे लागले. ‘एका फिट व्यक्तीला अचानक असं निदान होणं म्हणजे पायाखालची जमीन सरकणं, आकाश कोसळणं, आभाळ फाटणं जणू या सर्वांची पटकन ओळख झाली. पण आशाने रडायचं नाही..तर लढायचं..! हे ठरवलं.’ असं ती आपल्या पुस्तकात म्हणते. आज विज्ञान फार पुढे गेलंय. कोणत्याही मोठ्या आजारातून माणूस बाहेर येऊ शकतो. पण मानवी मन आजाराचे नाव ऐकूनच खचतं. परंतु आशाच्या सकारात्मकतेने तिला तिने स्वतः डॅाक्टरांच्या मदतीने बाहेर काढले असेच मी म्हणेन. नवरा बंगलोरला कामानिमित्त असताना त्याला न सांगता, आईचं वय झालं असताना, कुणालाही न सांगता एकटीने निर्णय घेत तिनं तिचे ॲापरेशन करून घेतलं. खरं तर हे धाडसं सर्वांमध्ये नसतं. आणि डॅाक्टरी तपासणी पासून ते ॲापरेशन व पुन्हा तपासणी असे सारे अनुभव दिनांकासह दैनंदिन डायरीत लिहित गेली व यातून ‘ब्युटी ऑफ लाईफ – द डायरी ऑफ कॅन्सर सर्व्हायवर’ या पुस्तकाचा जन्म झाला.

केमोथेरपी, रेडिएशन, शस्त्रक्रिया अशा कठीण टप्प्यांचा सामना तिने धैर्याने केला. ती म्हणते, ‘आयुष्यात एक प्रश्न सोडवला की दुसरा प्रश्न लगेच समोर उभा रहात असतो, तुम्हांला फक्त त्याचे उत्तर शोधायचे असते. जी काही परिस्थिती माझ्या वाट्याला आली त्या प्रत्येक गोष्टीला मला तोंड देण्यावाचून पर्याय नाही. यासाठी मनाची शक्ती एकवटणे खूप गरजेचे आहे.’ अशा तिच्या प्रत्येक वाक्याने आपलेही बळ वाढायला मदत होते. आयुष्यात कोणतेही काम करताना दोन मुलींचे संगोपन व पतीचा मानसिक आधार तिने महत्वाचे मानले. परंतु ही वेळ अशी आली की तिचा पती तिला पाहून उन्मळून पडला. त्याला तिने धीर दिला हे वाचून मन गलबलून गेलं. अगदी जवळच्या मित्र मैत्रिणी, नातेवाईकांसमोर तिने तिच्या हसतमुख चेहऱ्यामागील तिची वेदना, संघर्ष, कठीण प्रसंग येऊ दिले नाही.

तिला जसं डायरी लिहायची सवय तशीच प्रत्येक इव्हेंटचे फोटोसेशन करायची सुध्दा सवय असल्याने तिने फोटो या आठवणी असतात व आयुष्यातील काही प्रसंग पुन्हा पुन्हा घडत नाहीत या भावनेतून प्रत्येक क्षण अगदी गरोदरपण, मुलींचे वाढदिवस पासून ते कॅन्सर ट्रीटमेंटचेही फोटो काढले आहेत. केमोथरपीमधे सर्व केस जातात तेव्हा तिच्या एका फोटोग्राफर मित्राला तिने फोन केला व केस नसलेल्या फोटोसेशनसाठी घरी बोलावले. तिला पाहाताच त्याला धक्काच बसला. तेही फोटोशूट तिने खूप छान व हसतमुखाने करून घेतले.

आज तिने केवळ २ वर्षात ३५०० हून अधिक कॅन्सर रुग्णांशी संवाद व मानसिक आधार कॅन्सरविषयी सकारात्मकता व जागरूकता निर्माण करण्यासाठी लेखन केले आहे. तिच्या पुस्तकाच्या ६ महिन्यांत ३ आवृत्त्या प्रकाशित झाल्या. पुस्तकास पुणे, पिंपरी चिंचवड, सोलापूर, पुरंदर, ठाणे, फलटण, सातारा, जुन्नर, नाशिक, पंढरपूर, मुंबई, कोल्हापूर, कणकवली अशा विविध ठिकाणाहून एकूण १५ पुरस्कार २०२५ मधे मिळाले आहेत. विविध वृत्तपत्रांमध्ये व दिवाळी अंकांमध्ये कविता, लेख प्रकाशित होत आहेत.

‘’ब्युटी ऑफ लाईफ” हे फक्त एक पुस्तक नाही, तर ही एका स्त्रीच्या जिद्दीची, आत्मविश्वासाची आणि आशेची गोष्ट आहे जी कॅन्सरसारख्या शब्दालाही घाबरायचं नाही, असं सांगत आपल्याला पुन्हा जगण्याची उमेद देते. “ब्युटी ऑफ लाईफ या पुस्तकाच प्रयोजनच आहे प्रत्येकाच्या मनातून कॅन्सर” या शब्दाची भीती घालवणे.’ अशा शब्दांत ती सतत बोलत असते. अशा या धाडसी पण शांतपणे कॅन्सर सारख्या मोठ्या आजाराला सकारात्मक दृष्टीने हसतमुखाने इच्छाशक्तीच्या जोरावर सामोरे जाणाऱ्या आधुनिक नवदुर्गा आशाला मानाचा मुजरा…!!