सत्याचा शोध घेणे हेच काम कवीचे असते – अजय कांडर

कवयित्री सुगंधा देवरुखकर यांच्या काव्यसंग्रहाचे प्रकाशन

कणकवली :सत्याचा शोध घेणे हेच काम कवीचे असते.पण डोळ्यांनी दिसणाऱ्या जगापेक्षा मनाच्या डोळ्यांना दिसणारे सत्य अधिक मोठे असते. या सत्याचा शोध कवयित्री सुगंधा देवरुखकर यांनी त्यांच्या ‘मनश्चक्षू’ या काव्यसंग्रहातून घेतला आहे. जगण्याच्या सर्व स्तरांना स्पर्श करणारे लेखन या काव्यसंग्रहात असून, कवयित्री देवरुखकर यांनी आपल्या लेखनातून माणुसकीला सर्वाधिक महत्त्व दिले आहे, असे प्रतिपादन कवी आणि स्तंभ लेखक अजय कांडर यांनी येथे केले.

येथील मातोश्री मंगल कार्यालयाच्या सभागृहात अजय कांडर यांच्या अध्यक्षतेखाली प्रभा प्रकाशन, कणकवली प्रकाशित, सुगंधा देवरुखकर लिखित ‘मनश्चक्षू’ काव्यसंग्रहाचा प्रकाशन सोहळा पार पडला. साहित्य चळवळीतील ज्येष्ठ कार्यकर्ते आणि समाज साहित्य प्रतिष्ठानचे अध्यक्ष मधुकर मातोंडकर यांच्या प्रमुख उपस्थितीत झालेल्या या कार्यक्रमाच्या मंचावर कणकवली नगरपंचायतीचे प्रशासकीय अधिकारी श्री. मगर, ज्येष्ठ नागरिक संघटनेचे गोविंद साळकर, राजेश रेगे, सखाराम सकपाळ, कवयित्री रीमा भोसले, साहित्य संगीत संमेलन समितीचे अध्यक्ष तथा या कार्यक्रमाचे मुख्य संयोजक महेंद्र चव्हाण, चे ताली जाधव, शर्वरी जाधव, मंगेश आरेकर आदी उपस्थित होते.

श्री. मातोंडकर म्हणाले, “देवरुखकर यांच्या अनेक कवितांच्या मुळाशी त्यांचा जीवनप्रवास आहे. वडिलांनी शिक्षणासाठी केलेला कित्येक किलोमीटरचा पायपीट प्रवास, आपली मुले शिकली पाहिजेत यासाठी त्यांनी केलेली धडपड आणि त्यानंतर स्वतः शिक्षण घेण्यासाठी कवयित्रीने घेतलेले अतोनात कष्ट, हे सगळे त्यांच्या कवितांमध्ये अधूनमधून डोकावते. त्यामुळे त्यांची कविता ही केवळ कल्पनेतली नसून, ती अनुभवाच्या, कष्टाच्या आणि संघर्षाच्या मातीतून आलेली कविता आहे. या संग्रहाची पहिलीच ओळ आहे – ‘काट्यातही फुलाला शोधित हिंडते मी’. या एका ओळीतच कवयित्रीच्या जीवनाकडे पाहण्याच्या सकारात्मक दृष्टिकोनाचे दर्शन घडते.”

सुगंधा देवरुखकर म्हणाल्या, “माझ्या जगण्यातले, पाहण्यातले आणि भोगलेले जे काही आहे, त्याचाच आरसा म्हणजे माझ्या कविता होय. मला साहित्याची आवड होती. एका निबंध स्पर्धेत मी सहभाग घेतला आणि मला पारितोषिक मिळाले. त्यातून मला लेखनाची आवड निर्माण झाली आणि पुढे मी कविता लिहू लागले. कवी अजय कांडर यांच्या प्रोत्साहनामुळे मी कवितालेखन केले आणि हा कवितासंग्रह साकारला.”

यावेळी श्री. मगर, राजेश रेगे, गोविंद साळकर, रीमा भोसले, सखाराम सकपाळ आणि चेताला जाधव यांनीही आपले विचार व्यक्त केले. राजेश कदम यांनी सूत्रसंचालन केले. महेंद्र चव्हाण यांनी प्रास्ताविक केले. मंगेश आरेकर यांनी आभार मानले.