वेगळी वाट चोखाळणारी नवदुर्गा..!.. नेहा शिंदे

ओळख: वेगळी वाट चोखाळणाऱ्या नवदुर्गांची..!.. नेहा शिंदे

जीवनाकडे पाहण्याचा तिचा सकारात्मक दृष्टिकोन, परमेश्वरावरील अढळ विश्वास या तिच्या प्रेरणा आहेत. सर्व भावंडांवर माया करणारी, अडचणीत सर्वांना सावरून धरणारी, वेळ प्रसंगी खंबीर होऊन योग्य निर्णय घेणारी अर्पणा उर्फ नेहा म्हणजे भावंडांना मिळालेला एक आशीर्वादच आहे अशी सर्व भावंडांची तिच्याबद्दलची भावना आहे. अशा या प्रेमळ, शांत स्वभावाच्या, गुणी, जिद्दी, कष्टाळू, धीराच्या पण कणखर आधुनिक दुर्गा नेहाला मानाचा मुजरा…!!

ॲड. शैलजा मोळक
लेखक, कवी, संपादक, प्रकाशक
अध्यक्ष, शिवस्फूर्ती प्रतिष्ठान पुणे
मो. 9823627244

काही महिलांच्या वाट्याला संघर्ष हा असतोच. पण कोणत्याही परिस्थितीवर मात करून त्यातून बाहेर येऊन आपली वाट आपण निर्माण करण्याचे बळ सर्वांच्यात नसते. पण नेहासारख्या काही महिलांमधे ते येते म्हणूनच त्या आधुनिक नवदुर्गा ठरतात. लग्नानंतर पती हा माणूस प्रत्येक बाईच्या आयुष्यात फार महत्वाचा म्हणजेच तिचे आयुष्य घडवणारा व काही वेळा बिघडवणाराही असतो. नेहाच्या जीवनात तो बिघडवणारा ठरला. पण तिने त्यातून बाहेर येऊन एकल पालकत्व निभावताना येणाऱ्या अनंत अडचणींवर मात करत आज तिच्या जीवनाला स्थैर्य लाभले आहे.

पुणे महानगरपालिका शाळेत पदवीधर शिक्षिका म्हणून कार्यरत असणारी नेहा ही विजय आणि वर्षा थोरात यांची थोरली मुलगी अर्पणा. नावाप्रमाणेच सर्वकाही अर्पण करणारी. ज्या शाळेत ती पहिली ते सातवीपर्यंत शिकली त्याच शाळेत तिची आई वर्षा थोरात या शिक्षिका म्हणून कार्यरत होत्या. त्यानंतर आठवी ते दहावीपर्यंतचे तिचे शिक्षण पुण्यातील मॉडर्न हायस्कूलमध्ये झाले. लहानपणापासून ती खूप शांत, लाजरी व बुजरी असल्यामुळे आईने तिला धीट होण्यासाठी अकरावीला वाडिया कॉलेजमध्ये घातले. तेथे गेल्यानंतर ती थोडी धीट झाली. आई शिक्षिका असल्याने वडिलांपेक्षा जास्त कडक होती. तीन भावंडांमध्ये ती लाडकी होती. तिचे वडील पाचगणी येथे फॉरेनर लोकांना मराठी शिकवत असत, परंतु कालांतराने त्यांची तब्येत बरी नसल्याने ती नोकरी सोडून ते पुण्यात आले.

घरात संगीताचे वातावरण असल्यामुळे सर्व वाद्य तिच्या घरात होती. वडिलांना सर्व वाद्य वाजवता येत असत. तसेच आई देखील सुंदर आवाजात गाणी गात असे. आई- वडील दोघांचे गुण तिच्यामध्ये आले. तिचा आवाजही खूप छान आहे आणि ती नृत्य देखील खूप सुरेख करते. आई – वडील कामाला गेल्यानंतर घरात एकटी असताना रेडिओ लावून प्रत्येक गाण्यावर डान्स करायचा तिचा छंदच..! कॉलेजमध्ये गेल्यावर डान्स करायची तिला संधी मिळाली. अकरावी झाल्यानंतर आईने तिला डी. एड. ला घालण्याचे ठरवले. तिला कॉलेज करायचे होते. कॉलेजमध्ये तिला चांगले मित्र – मैत्रिणी भेटले होते, पण जबरदस्तीने का होईना आईने तिचा डी. एड. चा फॉर्म भरला पण काही दिवसातच तिच्या वडिलांचे अचानक निधन झाले.

संपूर्ण कुटुंबाची, भावंडांच्या शिक्षणाची जबाबदारी आईवर येऊन पडली. तिची आई खंबीर व स्वावलंबी होती. दु:खाने डगमगून न जाता दोन्ही मुली व एक मुलगा यांना स्वतःच्या हिंमतीवर तिच्या आईने उच्चशिक्षित केले. डी.एड झाल्यानंतर दोन महिन्यातच नेहाला १९९२ साली श्रीगोंदा तालुक्यातील मिशन शाळेत प्राथमिक शिक्षिकेची नोकरी लागली. घरापासून दूर जायची इच्छा नसतानाही आयुष्यात काही करून दाखवावे या आईच्या शिकवणुकीमुळे एक वर्षभर सर्वांपासून दूर राहून तिने त्या ठिकाणी प्रामाणिकपणे नोकरी केली. पुण्यात आल्यानंतर तिने सेंट जोसेफ हायस्कूल घोरपडी या ठिकाणी १९९३ साली वर्षभर काम केले आणि त्यानंतर शिक्षण विभाग, पुणे मनपामधे १९९५ साली शिक्षिका म्हणून ती रूजू झाली. अतिशय प्रेमळ आणि नम्र असणारी अर्पणा अजातशत्रू आहे. सारे नातेवाईक तिला घराण्याची शान मानतात. लग्नाच्या आधी सहा वर्ष नोकरी करून तिने कुटुंबाला खूप हातभार लावला. तिचे १९९९ साली लग्न झाले.

अतिशय प्रेमळ वातावरणात वाढलेली मुलगी अत्यंत कडक घरात गेली. परंतु तिने लग्नाअगोदर पाहिलेल्या स्वप्नांचा चुराडा झाला आणि ती कोमेजून गेली. पती व्यसनी निघाला त्यामुळे तिला आयुष्यात अनेक वाईट प्रसंगांना तोंड द्यावे लागले. पण ती अतिशय धीराने व शांतपणे सामोरी गेली. सर्व अत्याचार सहन करत राहिली. माहेरी त्रासाबद्दल सांगितलं तर माझ्यासोबत सर्वांनाच त्रास होईल या विचाराने ती सर्व त्रास सुरवातीला सहन करत राहिली. सुख तर सोडाच. पण त्या घरात तिला पुरेशी झोप सुद्धा मिळत नव्हती. तिची सर्व स्वप्न चक्काचूर झाली होती. कोणालाही काहीही न बोलल्याने त्याचा तिच्या तब्येतीवर व मनावर खूपच विपरित परिणाम होऊ लागला. अशातच तिला एक मुलगी व मुलगा झाला. मुलांकडे पाहून ती दिवस काढत होती. परिस्थिती बदलेल हा विचार करत होती. होणारी घुसमट तिला थांबवायची होती. मोकळा श्वास घेऊन नवीन व स्वतंत्र आयुष्य जगण्याचा विचार करत होती.

एक दिवस तिला कॅालेजमधील मैत्रिण शिल्पकला ही एका ट्रेनिंगमध्ये भेटली. ती शिक्षण विभाग, पुणे महानगरपालिकेत सहायक प्रशासकीय अधिकारी पदावर कार्यरत होती. नेहाने आपली सर्व वास्तव परिस्थिती तिला सांगितली व मला मोकळा श्वास घ्यायचाय, मुलांचं भवितव्य घडवायचंय, या त्रासातून मुक्त व्हायचंय त्यामुळे मला कळस येथील शाळेत बदली करुन देता आली तर बरं होईल अशी विनंती केली. शिल्पाने तिला बदलीसाठी सहकार्य केल्याने तिची बदली झाली व तिला रोजचा होणारा त्रास काही अंशी कमी झाला. काही दिवसांतच ती पतीचे घर सोडून कळसला राहायला आली. हा निर्णय घेताना तिची सर्व भावंडं आणि आई तिच्यामागे खंबीरपणे उभी राहिली. तेव्हा मुलगा पहिलीत व मुलगी तिसरीत होती. यानंतर तिचे संपूर्ण जीवन बदलले. शाळेतील वातावरण देखील खूप आनंददायी आणि छान होते. ती पूर्णपणे त्या शाळेमध्ये रमली. त्यामुळे तिला तिचे दुःख विसरण्यास मदत झाली. कळसला आल्यानंतर तिने बी. एड् पूर्ण केले. तिने पुन्हा एकदा नव्याने जीवन जगायला खऱ्या अर्थाने सुरुवात केली. पदरी दोन मुले होती परंतु खचून न जाता मोठ्या धैर्याने प्रत्येक प्रसंगाला तोंड देत एकल पालकत्व बजावत तिने आपल्या मुलांना उच्च शिक्षण दिले. तिने स्वत:च्या हिंमतीवर एक नव्हे तर दोन फ्लॅट घेतले. आज तिची मुलगी एका नामांकित कंपनीमध्ये नोकरी करत आहे. मुलाचेही शिक्षण पूर्ण होत आहे.

कितीही कठीण प्रसंग आले तरी रडत, कुढत न बसता त्याला कसे तोंड द्यावे, हे नेहाकडून शिकावे. नोकरी, मुलांचे संगोपन करत असताना ती आपले सर्व छंद जोपासते, मैत्रिणींच्या ग्रुपमध्ये सहभागी होते, वेगवेगळ्या सहलींना जाते, तिला करावकेवर विविध गाणी गायला फार आवडते. तिने आतापर्यंत स्टारमेकर्सवर ४००० गाणी गायली आहे. ती नृत्य, संगीतामध्ये स्वतःला विसरून जाते. सूत्रसंचलन करणे, विद्यार्थ्यांच्या विकासासाठी विविध उपक्रम, स्नेहसंमेलनात विद्यार्थ्यांचे विविध कार्यक्रम बसवणे असे अष्टपैलू व्यक्तिमत्व असलेली अतिशय प्रेमळ, कष्टाळू, जिद्दी, मनमिळावू, धीट, विद्यार्थीप्रिय, अजातशत्रू असलेली, सर्व मैत्रिणींची व नातेवाईकांची लाडकी, सर्वांच्या मदतीला धावून जाणारी नेहा सेंट जॉन्स चर्चमध्येही महिला मंडळात खजिनदार म्हणून काम पाहत आहे. घरोघरी प्रार्थना, तसेच चर्चच्या अनेक उपक्रमात ती उत्साहाने भाग घेत असते. ती दर रविवारी चर्चला आवर्जून जाते. चर्चच्या विविध उपक्रमात वक्तृत्व, गायन, नृत्य, सूत्रसंचलन, मनोगत व्यक्त करणे, विविध स्पर्धांमध्ये तिने बक्षिसेही मिळवली आहेत. आतापर्यंत ३३ वर्षे शिक्षिका म्हणून तिने अतिशय प्रामाणिकपणे काम केले आहे. अनेक क्षेत्रात काम करणारे तिचे विद्यार्थी आजही तिला भेटायला येतात. हीच तिच्या आजवरच्या कामाच्या यशाची पावती आहे.

सतरा वर्ष तिने निवडणूकीत बीएलओ चे काम केले आहे. कोणत्याही कामाला तिचा कधीच नकार नसतो. भटकंती, स्वयंपाक, गाणी, नृत्य, वाचन अशा गोष्टी तिला आवडतात. जीवनाकडे पाहण्याचा तिचा सकारात्मक दृष्टिकोन, परमेश्वरावरील अढळ विश्वास या तिच्या प्रेरणा आहेत. सर्व भावंडांवर माया करणारी, अडचणीत सर्वांना सावरून धरणारी, वेळ प्रसंगी खंबीर होऊन योग्य निर्णय घेणारी अर्पणा उर्फ नेहा म्हणजे भावंडांना मिळालेला एक आशीर्वादच आहे अशी सर्व भावंडांची तिच्याबद्दलची भावना आहे. अशा या प्रेमळ, शांत स्वभावाच्या, गुणी, जिद्दी, कष्टाळू, धीराच्या पण कणखर आधुनिक दुर्गा नेहाला मानाचा मुजरा…!!