कोल्हापूर : जागतिक जैवविविधता दिन (२२ मे) आणि जागतिक पर्यावरण दिन (५ जून) यानिमित्त जनरल प्रॅक्टिशनर्स असोसिएशन, कोल्हापूर, गार्डन्स क्लब, कोल्हापूर तसेच प्रा. डॉ. एन. डी. पाटील महाविद्यालय, मलकापूर-पेरीड येथील वनस्पतीशास्त्र विभाग यांच्यावतीने टाऊन हॉल उद्यानात ‘हेरिटेज ट्री वॉक’चे आयोजन करण्यात आले. सकाळी ७ ते ९.३० या वेळेत झालेल्या या उपक्रमाला विविध क्षेत्रांतील ७५ हून अधिक निसर्गप्रेमींनी उत्स्फूर्त प्रतिसाद दिला.
कोल्हापूर हे समृद्ध वृक्षसंपदा आणि नैसर्गिक सौंदर्याने नटलेले शहर आहे. शहरातील ऐतिहासिक आणि निसर्गसमृद्ध वारसा स्थळांपैकी टाऊन हॉल उद्यान हे एक महत्त्वाचे उद्यान मानले जाते. १८७६ मध्ये मेजर मंट यांनी उभारलेल्या ब्रिटिशकालीन नगरमंदिराभोवती सुमारे आठ एकर परिसरात हे उद्यान विकसित करण्यात आले आहे. येथे अनेक दुर्मिळ, औषधी, शोभिवंत तसेच देशी-विदेशी वृक्षांची लागवड करण्यात आली आहे.
टाऊन हॉल उद्यानातील या हरित वारशाची माहिती नागरिकांना व्हावी आणि दुर्मिळ वनस्पतींचे महत्त्व समजावे, या उद्देशाने या ट्री वॉकचे आयोजन करण्यात आले होते. कार्यक्रमाच्या प्रारंभी डॉ. हरीश नांगरे यांनी प्रास्ताविक व स्वागत केले, तर डॉ. शिवराज जितकर यांनी अध्यक्षीय मनोगत व्यक्त केले.
या उपक्रमात वनस्पतीतज्ज्ञ डॉ. मकरंद ऐतवडे यांनी सहभागी निसर्गप्रेमींना उद्यानातील दुर्मिळ वृक्षांची शास्त्रीय माहिती दिली. तसेच त्यांच्या औषधी गुणधर्मांबरोबरच शास्त्रीय नावांचा अर्थ आणि विविध उपयोग याविषयीही मार्गदर्शन केले. जारुल, भुताचे झाड, अमलतास, कापूर, रडणारे झाड, पुत्रंजीव, भेर्लीमाड, तोफगोळ्याचे झाड, मुचकुंद, सुवर्णपर्णी, महोगनी, ब्राउनिया, सीता अशोक, चीटणीसांचे झाड, सायकस, ऑटोग्राफ ट्री, वॉलनट आणि पॅचेरा यांसारख्या अनेक महत्त्वाच्या वृक्षांची माहिती सहभागींसमोर उलगडण्यात आली.
उपक्रमानंतर डॉ. सुश्रुत हर्डीकर, डॉ. लक्ष्मीकांत पाटील, डॉ. शीतल पाटील, डॉ. अजय हनमाने आणि डॉ. शुभांगी पित्रे यांनी मनोगते व्यक्त केले. सौ. पल्लवी कुलकर्णी यांनी आभार मानले. हा उपक्रम यशस्वी होण्यासाठी टाऊन हॉल उद्यानाचे अधीक्षक, कर्मचारी तसेच परितोष उरकुडे यांचे मोलाचे सहकार्य लाभले.
