व्यवस्थेतील दांभिकपणा, सामाजिक वास्तव आणि पुरोगामीत्वातील सोंग यांवर प्रखर शब्दांत आसूड ओढणाऱ्या नागपूरचे कवी लोकनाथ यशवंत यांच्या ‘हे तर होणारच होते’ या काव्यसंग्रहाला लोककवी विठ्ठल वाघ राज्यस्तरीय काव्य पुरस्कार २०२५ जाहीर झाला आहे. लक्षदीप फाउंडेशनतर्फे दिल्या जाणाऱ्या या पुरस्काराचे स्वरूप ११ हजार रुपये रोख, सन्मानचिन्ह, सन्मानपत्र, शाल आणि श्रीफळ असे आहे.
नाशिक : जिल्ह्यातील लक्षदीप फाउंडेशन मार्फत दरवर्षी महाराष्ट्रातल्या एक उत्कृष्ट कविता संग्रहाला लोककवी विठ्ठल वाघ राज्यस्तरीय काव्य पुरस्कार दिला जातो. २०२५ यावर्षीचा पुरस्कार नागपूर येथील कवी लोकनाथ यशवंत यांच्या ‘हे तर होणारच होते ‘ या काव्यसंग्रहाला जाहीर झाला आहे. अकरा हजार रुपये रोख, सन्मानचिन्ह, सन्मानपत्र, शाल श्रीफळ असे स्वरूप असणाऱ्या या पुरस्काराची निवड. महाराष्ट्रातले नामवंत कवी लक्ष्मण महाडिक यांच्या अध्यक्षतेखालील निवड समितीने केली,अशी माहिती लक्षदीप फाउंडेशनचे कवी संदीप जगताप व शीतल कुयटे यांनी दिली आहे.
लोकनाथ यशवंत यांच्या हे तर होणारच होते या कविता संग्रहामध्ये लोकल प्रश्नांपासून तर ग्लोबल सत्यापर्यंत व्याप्ती,व्यवस्थेतील दांभिकपणा , पुरोगामीत्वातील सोंग अशा विषयांवर प्रखर आसूड ओढले आहे. गावाकडच्या बाया बापड्यांना पाण्यासाठी मैल अन् मैल पायपीट करावी लागते. विहीर किती खोल खोदली तर पाणी लागत नाही. पण आमची व्यवस्था उंच झाडावरील नारळात पाणी गेलेच कसे ? याची चौकशी करण्यात व्यस्त आहे. यासारखे या कवितासंग्रहात ज्वलंत विषय घेऊन..डोळ्यात अंजन घालणारी कविता आली आहे.
ही कविता केवळ शब्दांची कारागिरी नसून नासक्या व्यवस्थेविरुद्ध उठवलेला आवाज आहे. उपरोध , तीव्र संताप अन् वास्तववाद हे या कवीचे धारदार शस्त्र आहे. अशी वेगळ्या आशयाची , विषयाची कविता यशवंत यांच्या हे तर होणारच होते या कविता संग्रहात आली आहे. म्हणून यावर्षीचा लोककवी विठ्ठल वाघ पुरस्कार या संग्रहाला जाहीर झाला आहे.
हा पुरस्कार वितरण सोहळा मोठ्या दिमाखात थोड्याच दिवसात पिंपळगाव बसवंत येथे संपन्न होणार आहे. हा पुरस्कार जाहीर झाल्याबद्दल महाराष्ट्रातील अनेक नामवंत साहित्यिक कवी विचारवंत यांनी लोकनाथ यशवंत यांचे अभिनंदन केले आहे.
