- वडोदऱ्यात २५ ऑक्टोबरला भरणार ऐतिहासिक २०० वे ‘सयाजीराजे गायकवाड मराठी साहित्य संमेलन’
- संमेलनाध्यक्षपदी साहित्यिक किशोर टिळेकर यांची निवड
पुणे :अखिल भारतीय मराठी साहित्य परिषदेच्या वतीने आयोजित करण्यात येणारे ऐतिहासिक ‘१ ले सयाजीराजे गायकवाड मराठी साहित्य संमेलन’ येत्या २५ ऑक्टोबर २०२६ रोजी गुजरात राज्यातील वडोदरा येथे होणार आहे. विशेष म्हणजे, अखिल भारतीय मराठी साहित्य परिषदेचे २०० वे साहित्य संमेलन असून, या संमेलनाचे अध्यक्षपद साहित्यिक किशोर टिळेकर भूषवणार आहेत, अशी माहिती साहित्य परिषदेचे राष्ट्रीय अध्यक्ष डॉ. शरद गोरे यांनी दिली आहे.
यावेळी साहित्य परिषदेचे पुणे विभागीय अध्यक्ष सुर्यकांत नामुगडे हे उपस्थित होते, साहित्यिक किशोर टिळेकर हे गेल्या तीन दशकांहून अधिक काळ मराठी साहित्य क्षेत्रात कार्यरत आहेत. ते आपल्या विशेष ग्रामीण लेखनशैलीसाठी लोकप्रिय आहेत. त्यांच्या लेखणीतून ‘काहूर’, ‘षटकार’, ‘पुढारी’, ‘राजकारण’ यांसह एकूण १० दर्जेदार ग्रंथांचे लेखन झाले आहे. त्यांनी यापूर्वीही विविध साहित्य संमेलनांचे अध्यक्षपद भूषवले असून त्यांच्या साहित्यिक व सामाजिक योगदानाबद्दल त्यांना अनेक प्रतिष्ठित पुरस्कारांनी गौरविण्यात आले आहे. त्यांच्या अध्यक्षपदाखाली वडोदऱ्यातील हे संमेलन अधिक समृद्ध होईल, असा विश्वास व्यक्त केला जात आहे.
वडोदरेचे महाराजा राजर्षी सयाजीराव गायकवाड हे केवळ गुजरातपुरते मर्यादित नसून संपूर्ण देशासाठी एक सुधारक, आदर्श प्रशासक आणि दूरगामी विचारांचे राजे म्हणून परिचित आहेत. त्यांनी आपल्या संस्थानात मोफत व सक्तीच्या प्राथमिक शिक्षणाचा पाया रचला, ग्रंथालयांची चळवळ गावोगावी पोहोचवली आणि अस्पृश्यता निवारण, स्त्री-शिक्षण, समता व बंधुभाव या मूल्यांना प्रत्यक्ष कृतीतून बळ दिले. लोककला, साहित्य आणि कलावंतांना राजाश्रय देऊन त्यांनी महाराष्ट्रासह संपूर्ण देशाच्या सांस्कृतिक वारशाला नवी उंची प्राप्त करून दिली. त्यांच्या याच बहुमोल व पुरोगामी योगदानाचा गौरव करण्यासाठी या पहिल्यावहिल्या संमेलनाला त्यांचे नाव देण्यात आले आहे.
या संमेलनाच्या स्वागताध्यक्षपदी अखिल भारतीय मराठी साहित्य परिषदेच्या गुजरात प्रदेश उपाध्यक्ष रंजनादेवी भोईटे या, तर निमंत्रक म्हणून गुजरात प्रदेश सरचिटणीस मानसी म्हसकर या जबाबदारी सांभाळत आहेत.
वडोदरा येथील या २०० व्या ऐतिहासिक साहित्य संमेलनास महाराष्ट्र आणि गुजरातसह देश-विदेशातून मोठ्या संख्येने साहित्यिक, लेखक, कवी आणि मराठी भाषाप्रेमी रसिक उपस्थित राहणार आहेत. या संमेलनाच्या यशस्वीतेसाठी साहित्य परिषदेचे पदाधिकारी व कार्यकर्ते परिश्रम घेत आहेत.
