कोल्हापूर – वर्डप्रेस व्यावसायिक, फ्रीलान्सर्स, एजन्सी मालक आणि विद्यार्थी यांच्यासाठी एक अद्वितीय व्यासपीठ म्हणजे वर्डकॅम्प कोल्हापूर २०२६. या वर्षी कार्यक्रमात लोकेश बुधराणी, अनिंदो नील दत्ता, शामली सुलाखे, आनंद उपाध्याय, साजिद अन्सारी, यशवर्धन राणा, प्रथमेश पालवे, सुनील कुमार शर्मा आणि नागेश पै यांसारखे तज्ज्ञ वक्ते सहभागी होत आहेत.
कार्यक्रमात वर्डप्रेस समुदायात योगदान, प्रकल्प व्यवस्थापन, WP-CLI साधनांचा उपयोग, WooCommerce स्टोअर तयार करणे, रिमोट वर्कमध्ये संतुलन साधणे आणि लहान एजन्सींसाठी शाश्वत वाढीची रणनीती यासंबंधी मार्गदर्शन व हँड्स-ऑन कार्यशाळा आयोजित केल्या आहेत.
वर्डप्रेस समुदायात योगदानाच्या संधींवर लोकेश बुधराणी करणार मार्गदर्शन
वर्डप्रेस प्रकल्प आणि जागतिक वर्डप्रेस समुदायामध्ये व्यक्ती कशा पद्धतीने योगदान देऊ शकतात, याबाबत लोकेश बुधराणी हे मार्गदर्शन करणार आहेत. वर्डप्रेससारख्या मुक्त-स्रोत (ओपन सोर्स) प्रकल्पात सक्रिय सहभाग का महत्त्वाचा आहे, यावर ते प्रकाश टाकतील.
लोकेश हे एक बहुआयामी व्यक्तिमत्त्व असून ते डेव्हलपर, कंट्रिब्युटर आणि एमबीए पदवीधर आहेत. वित्त (Finance) आणि तंत्रज्ञान (Technology) या दोन्ही क्षेत्रांमध्ये त्यांची समान रुची असून सध्या ते बीडीओ इंडिया सर्व्हिसेस प्रायव्हेट लिमिटेड येथे असिस्टंट मॅनेजर म्हणून फायनान्स डिजिटल स्पेसमध्ये कार्यरत आहेत.
वर्डप्रेस प्रकल्पात केवळ कोडिंगद्वारेच नव्हे, तर कंटेंट लेखन, डिझाइन, सपोर्ट, डॉक्युमेंटेशन आणि समुदाय बांधणी अशा विविध माध्यमांतून योगदान देण्याच्या संधी उपलब्ध आहेत. वर्डप्रेस समुदायात सक्रिय सहभाग घेतल्यास शिकण्याची प्रक्रिया अधिक समृद्ध होते, प्रत्यक्ष अनुभव मिळतो आणि आंतरराष्ट्रीय स्तरावर ओळख निर्माण होते. योगदानाच्या माध्यमातून व्यक्तींना सहकार्याच्या संधी, व्यावसायिक विकास आणि करिअरच्या नव्या वाटा खुल्या होतात. वर्डप्रेस समुदाय हा एक शिस्तबद्ध, सहकार्यावर आधारित आणि ‘एकत्र बांधणे, एकत्र शिकणे आणि एकत्र वाढणे’ या तत्त्वांवर विश्वास ठेवणारा समुदाय आहे. या संदर्भात लोकेश मार्गदर्शन करणार आहेत.
प्रवास, फोटोग्राफी, डीजेइंग, विविध खाद्यसंस्कृतींचा अभ्यास आणि लोकांशी संवाद साधणे या गोष्टींची आवड असलेले लोकेश हे सतत काहीतरी नवीन शिकण्यावर विश्वास ठेवतात. दररोज काहीतरी नवीन शिकायला मिळते, ही त्यांची ठाम धारणा असून त्याच दृष्टिकोनातून वर्डप्रेस समुदायात योगदान देण्याचे आवाहन त्यांनी केले आहे.
अनिंदो नील दत्ता करणार ‘स्कोप क्रीप’मुळे होणाऱ्या मानसिक तणावावर भाष्य
वर्डप्रेस डेव्हलपर्स आणि तंत्रज्ञान क्षेत्रातील व्यावसायिकांना भेडसावणाऱ्या एका अत्यंत सूक्ष्म पण गंभीर समस्येवर प्रकाश टाकणारे सत्र वर्डकॅम्प कोल्हापूर २०२६ मध्ये आयोजित करण्यात आले आहे. “Stress from Scope Creep: The Psychological Cost of ‘Can You Also…?’” या विषयावर सुप्रसिद्ध फुल-स्टॅक इंजिनिअर अनिंदो नील दत्ता मार्गदर्शन करणार आहेत.
अनिंदो नील दत्ता हे AI, WordPress आणि ओपन सोर्स यांच्या संगमावर काम करणारे एक अभ्यासू व अनुभवी तंत्रज्ञ आहेत. ते DocPilot या एआय-आधारित डॉक्युमेंटेशन प्लॅटफॉर्मचे निर्माते असून Zen Doc या कोडबेससाठी त्वरित व संदर्भानुसार डॉक्युमेंटेशन तयार करणाऱ्या CLI टूलचेही त्यांनी विकास केलेला आहे. प्रत्यक्ष प्रकल्पांतील अनुभव आणि व्यावहारिक दृष्टिकोन यांची सांगड घालणारे वक्ते म्हणून ते डेव्हलपर समुदायात परिचित आहेत.
आपल्या सत्राविषयी माहिती देताना अनिंदो सांगतात की, बहुतांश वर्डप्रेस प्रकल्पांची सुरुवात एका निरुपद्रवी वाटणाऱ्या वाक्याने होते –
“हे एक छोटेसे बदल करून द्याल का?”
सुरुवातीला ‘हो’ म्हणणे सोपे वाटते. वर्डप्रेसमुळे बदल सहज शक्य वाटतात आणि आपण मदतीसाठी तत्पर असतो. मात्र अशा छोट्या-छोट्या विनंत्या हळूहळू वाढत जातात. काम पूर्ण झाल्यासारखे वाटत नाही, प्रकल्पाची शेवटची रेषा सतत पुढे सरकत राहते आणि समाधानाच्या जागी हळूहळू तणाव, चिंता आणि थकवा निर्माण होतो.
या सत्रात अनिंदो नील दत्ता प्रत्यक्ष वर्डप्रेस प्रकल्पांतील अनुभवांच्या आधारे सांगणार आहेत की, स्कोप क्रीप केवळ वेळापत्रक किंवा बिलिंगवरच परिणाम करत नाही, तर तो नकळत मानसिक आरोग्यावरही गंभीर परिणाम करतो. सतत बदलणारा संदर्भ, अस्पष्ट सीमा, आणि ‘सगळ्यांना खूश ठेवण्याची’ अपेक्षा यामुळे काम तांत्रिकदृष्ट्या सोपे असले तरी मानसिक थकवा आणि बर्नआऊट निर्माण होतो.
वर्डप्रेस प्लॅटफॉर्मची लवचिकता ही त्याची ताकद असली, तरी त्याच लवचिकतेमुळे अशा सततच्या अतिरिक्त मागण्या वाढतात, असेही ते स्पष्ट करणार आहेत. या समस्येची लवकर ओळख कशी करावी, अपराधीपणाची भावना न ठेवता सीमा कशा ठरवाव्यात, आणि क्लायंटशी नातेसंबंध न बिघडवता स्वतःची मानसिक ऊर्जा कशी जपावी, यावर या सत्रात मानवी आणि व्यावहारिक उपाय मांडले जाणार आहेत.
हे सत्र क्लायंटवर दोष ठेवणारे किंवा कठोर नियम लादणारे नसून, दीर्घकालीन, आरोग्यदायी आणि शाश्वत कामपद्धती कशा विकसित करता येतील, यावर केंद्रित आहे. “प्रत्येक ‘Can you also…?’ सोबत आपले करिअर नकळत जळून जाऊ नये,” हा या सत्राचा गाभा असल्याचे अनिंदो नील दत्ता सांगतात.
वर्डप्रेस डेव्हलपर्स, फ्रीलान्सर्स, एजन्सी मालक आणि तंत्रज्ञान क्षेत्रातील सर्व व्यावसायिकांसाठी हे सत्र अत्यंत उपयुक्त ठरणार आहे.
मोठ्या वर्डप्रेस प्रकल्पांच्या रचनेवर करणार शामली सुलाखे मार्गदर्शन
मोठ्या आणि गुंतागुंतीच्या वर्डप्रेस प्रकल्पांचे यशस्वी नियोजन व अंमलबजावणी कशी करावी, याबाबत मौलिक मार्गदर्शन करणारे सत्र वर्डकॅम्प कोल्हापूर २०२६ मध्ये आयोजित करण्यात आले आहे. “Learnings from Structuring Large WordPress Projects” या विषयावर अनुभवी तांत्रिक नेत्या शामली सुलाखे उपस्थितांना मार्गदर्शन करणार आहेत.
शामली सुलाखे या एक नम्र, अभ्यासू आणि उत्कट वर्डप्रेस तज्ज्ञ असून त्यांना ८ वर्षांहून अधिक तांत्रिक अनुभव आहे. प्रोजेक्ट मॅनेजमेंट, वर्डप्रेस डेव्हलपमेंट, परफॉर्मन्स ऑप्टिमायझेशन, वेबसाइट स्केलिंग, सुरक्षा आणि माइग्रेशन अशा विविध क्षेत्रांत त्यांचे सखोल कौशल्य आहे. २०१७ मध्ये वर्डप्रेस डेव्हलपर म्हणून कारकीर्दीची सुरुवात केल्यानंतर त्यांनी डेव्हलपर, मेंटॉर ते टेक्निकल लीडर अशी विविध जबाबदाऱ्या यशस्वीपणे सांभाळल्या आहेत.
संरचित प्रकल्प नियोजन (Structured Project Planning) आणि टीम लीडरशिप या विषयांत त्यांना विशेष रस असून, समुदायासाठी योगदान देणे आणि ज्ञानवाटप हे त्यांच्या कामाचे महत्त्वाचे अंग आहे. त्यांनी अनेक वर्डकॅम्प्स आणि तांत्रिक परिषदांमध्ये वक्त्या, पॅनेल जज आणि आयोजक म्हणून सहभाग घेतला आहे. विशेष म्हणजे, त्या वर्डकॅम्प आशिया २०२६ च्या आयोजकांपैकी एक आहेत.
या सत्रात शामली सुलाखे मोठ्या वर्डप्रेस प्रकल्पांमध्ये येणाऱ्या आव्हानांवर प्रकाश टाकणार आहेत. अनेक स्टेकहोल्डर्स, बदलत्या गरजा, वेगवेगळ्या ठिकाणी कार्यरत असलेल्या टीम्स आणि मर्यादित वेळापत्रक अशा परिस्थितीत स्पष्ट रचना नसेल, तर प्रकल्प हाताबाहेर जाण्याची शक्यता वाढते. त्यामुळे विलंब, पुन्हा-पुन्हा करावी लागणारी कामे आणि संवादातील तुटवडा निर्माण होतो.
एजन्सी वातावरणात मध्यम ते मोठ्या वर्डप्रेस प्रकल्पांची रचना व अंमलबजावणी करताना मिळालेल्या प्रत्यक्ष अनुभवांवर आधारित व्यावहारिक शिकवण या सत्रात दिली जाणार आहे. सुरुवातीलाच सर्व गरजा स्पष्ट नसताना प्रकल्पाची रचना कशी करावी, नियोजन, अंमलबजावणी आणि टीममधील सहकार्यावर त्याचा कसा प्रभाव पडतो, याचे सविस्तर विश्लेषण या सत्रात करण्यात येणार आहे.
मोठ्या प्रकल्पांचे लहान टप्प्यांत विभाजन, टीम सदस्यांच्या जबाबदाऱ्या स्पष्टपणे ठरवणे, तसेच पारदर्शकता आणि उत्तरदायित्व वाढवणाऱ्या प्रक्रिया कशा उभाराव्यात, याबाबत उपस्थितांना मार्गदर्शन मिळणार आहे. यासोबतच स्कोप बदल, डिपेन्डन्सी मॅनेजमेंट, डेव्हलपमेंट–डिझाइन–स्टेकहोल्डर्स यांच्यातील समन्वय अशा प्रत्यक्ष प्रकल्पांमध्ये येणाऱ्या सामान्य अडचणी आणि त्यावर यशस्वी ठरलेल्या उपाययोजना मांडल्या जाणार आहेत.
वर्डप्रेस प्रकल्पांचे नियोजन आणि अंमलबजावणी करणारे डेव्हलपर्स, प्रोजेक्ट मॅनेजर्स आणि टीम लीडर्स यांच्यासाठी हे सत्र विशेष उपयुक्त ठरणार आहे. मोठ्या वर्डप्रेस प्रकल्पांमध्ये अचूकता, अंदाजक्षमता आणि कार्यक्षम अंमलबजावणी कशी साध्य करता येईल, याची दिशा देणारे हे सत्र ठरेल.
आनंद उपाध्याय यांची ‘वर्डप्रेस प्लेग्राउंड’वर प्रत्यक्ष कार्यशाळा
वर्डप्रेस शिकण्याची आणि वापरण्याची पद्धत अधिक सुलभ व आधुनिक करणाऱ्या WordPress Playground या तंत्रज्ञानावर आधारित विशेष हँड्स-ऑन वर्कशॉप वर्डकॅम्प कोल्हापूर २०२६ मध्ये आयोजित करण्यात आले आहे. “Getting Started with WordPress Playground” या विषयावर वर्डप्रेस क्षेत्रातील ज्येष्ठ योगदानकर्ता आनंद उपाध्याय मार्गदर्शन करणार आहेत.
राजस्थानमधील अजमेर येथील आनंद उपाध्याय हे २०१० पासून वर्डप्रेस परिसंस्थेत सक्रिय असून Core, Docs, Community आणि Polyglots अशा विविध Make WordPress टीम्समध्ये त्यांनी महत्त्वाचे योगदान दिले आहे. वर्डप्रेसमध्ये अधिकाधिक लोकांचा सहभाग वाढावा यासाठी ते सातत्याने कार्यरत असून समुदाय घडवणे आणि नव्या योगदानकर्त्यांना प्रोत्साहन देणे हे त्यांच्या कामाचे प्रमुख उद्दिष्ट आहे.
आनंद उपाध्याय हे WPVibes या वर्डप्रेस प्लगइन डेव्हलपमेंट कंपनीचे संस्थापक असून, वर्डप्रेस आणि वूकॉमर्स वापरकर्त्यांसाठी परफॉर्मन्स-आधारित साधने विकसित करतात. ते नियमित वर्डकॅम्प वक्ते, मीटअप आयोजक असून विद्यार्थ्यांपर्यंत वर्डप्रेस शिक्षण पोहोचवण्यासाठी विशेष प्रयत्नशील आहेत.
२०२४ मध्ये त्यांनी पहिला WordPress Campus Connect उपक्रम सुरू करण्यास महत्त्वाची भूमिका बजावली. हा उपक्रम पुढे जाऊन वर्डप्रेस फाउंडेशनकडून अधिकृत मान्यता प्राप्त जागतिक कार्यक्रम ठरला. आजही ते विविध कार्यक्रम, कार्यशाळा आणि ओपन-सोर्स उपक्रमांच्या माध्यमातून विद्यार्थी समुदायाला मार्गदर्शन व पाठबळ देत आहेत.
या सत्रात आनंद उपाध्याय WordPress Playground या संकल्पनेची सविस्तर ओळख करून देणार आहेत. वर्डप्रेस प्लेग्राउंडमुळे कोणतेही होस्टिंग, डेटाबेस किंवा लोकल सेटअप न करता थेट ब्राउझरमध्ये वर्डप्रेस चालवता येतो. याला पुढे नेणारी संकल्पना म्हणजे Blueprints, ज्यामुळे वर्डप्रेस वातावरण पुन्हा-पुन्हा, अचूक आणि शेअर करण्यायोग्य स्वरूपात तयार करता येते.
या हँड्स-ऑन वर्कशॉपमध्ये सहभागी प्रत्यक्ष वर्डप्रेस प्लेग्राउंडमध्ये काम करतील. साध्या प्लेग्राउंड इन्स्टन्सपासून सुरुवात करून ब्लूप्रिंट्सद्वारे वर्डप्रेसची आवृत्ती, थीम, प्लगइन आणि सेटिंग्ज कशा पद्धतीने संरचित स्वरूपात परिभाषित केल्या जातात, हे शिकवले जाणार आहे.
कार्यशाळेत पुढील विषयांचा समावेश असेल –
वर्डप्रेस प्लेग्राउंड म्हणजे काय आणि ते ब्राउझरमध्ये कसे कार्य करते ?
प्लेग्राउंड कधी वापरावे आणि कधी वापरू नये ?
ब्लूप्रिंट्स म्हणजे काय आणि त्यांची गरज का आहे ?
वर्डप्रेस ब्लूप्रिंटची रचना समजून घेणे
उपलब्ध ब्लूप्रिंट उदाहरणांचा वापर
ब्लूप्रिंट-आधारित लिंक्सद्वारे वर्डप्रेस साइट्स सुरू करणे
टेस्टिंग, डेमो, शिकवण आणि ऑनबोर्डिंगसाठी ब्लूप्रिंट्सचे प्रत्यक्ष उपयोग
या कार्यशाळेचा मुख्य लाभ असा की, सहभागी वर्डप्रेस प्लेग्राउंड आत्मविश्वासाने वापरू शकतील आणि ब्लूप्रिंट्समुळे टेस्टिंग, डेमो, शिक्षण आणि ऑनबोर्डिंग प्रक्रिया कशा सुलभ होतात, याची स्पष्ट समज मिळेल. वर्डप्रेस शिकणारे विद्यार्थी, डेव्हलपर्स, प्रशिक्षक आणि समुदाय आयोजकांसाठी हे सत्र अत्यंत उपयुक्त ठरणार आहे.
साजिद अन्सारी यांचे ‘WP-CLI’वर मार्गदर्शन सत्र
वर्डप्रेस डेव्हलपर्ससाठी कामाची गती वाढवणारे आणि दैनंदिन काम अधिक सोपे करणारे प्रभावी साधन असलेल्या WP-CLIवर आधारित विशेष सत्र वर्डकॅम्प कोल्हापूर २०२६ मध्ये आयोजित करण्यात आले आहे. “WP-CLI Basics: Supercharging Your WordPress Workflow” या विषयावर अनुभवी वर्डप्रेस आणि फुल-स्टॅक डेव्हलपर मोहम्मद साजिद अन्सारी मार्गदर्शन करणार आहेत.
मोहम्मद साजिद अन्सारी हे WebMS Consultancy या वर्डप्रेस डेव्हलपमेंट आणि ऑटोमेशन वर्कफ्लोमध्ये विशेषज्ञ असलेल्या संस्थेचे CEO आणि संस्थापक आहेत. यासोबतच ते ऑस्ट्रेलियातील वेगाने वाढणाऱ्या रेस्टॉरंट साखळी Guzman y Gomez (GYG) येथे फुल-स्टॅक इंजिनिअर म्हणून कार्यरत असून, एंटरप्राइज-स्तरीय सिस्टिम्स, ऑटोमेशन पाइपलाईन्स आणि मोठ्या प्रमाणातील डेटा अॅप्लिकेशन्स विकसित करतात.
१० वर्षांहून अधिक अनुभवाच्या आधारावर साजिद अन्सारी यांनी कस्टम प्लगइन्स, WP-CLI टूल्स, डेटा सिंक इंजिन्स, इम्पोर्ट पाइपलाईन्स, AI-सहाय्यित ऑटोमेशन टास्क्स आणि स्केलेबल आर्किटेक्चर्स विकसित केली आहेत. React, Node.js, REST APIs, TypeORM आणि प्रगत वर्डप्रेस फ्रेमवर्क्समधील त्यांचे कौशल्य उल्लेखनीय आहे. त्यांचा वैयक्तिक पोर्टफोलिओ iamsajidansari.com वर पाहायला मिळतो.
वर्डप्रेस समुदायात ते एक सक्रिय नेतृत्व म्हणून ओळखले जातात. वक्ते, स्वयंसेवक, मार्गदर्शक आणि आयोजक अशा विविध भूमिकांमध्ये त्यांनी अनेक वर्डकॅम्प्समध्ये योगदान दिले आहे. सध्या ते वर्डकॅम्प सुरत २०२५ चे लीड ऑर्गनायझर असून, सुरत शहरातील पहिल्या वर्डकॅम्पचे दृष्टीकोन, धोरण आणि समुदाय सहभाग घडविण्याची जबाबदारी ते सांभाळत आहेत.
या सत्रात साजिद अन्सारी WP-CLI म्हणजे काय, ते वर्डप्रेस डेव्हलपर्ससाठी का महत्त्वाचे आहे, याची सोपी आणि समजण्याजोगी ओळख करून देणार आहेत. वर्डप्रेस डॅशबोर्ड न उघडता प्लगइन इन्स्टॉल करणे, युजर्स मॅनेज करणे, सर्च-रिप्लेस करणे, डेटा एक्सपोर्ट करणे, क्रॉन जॉब्स चालवणे आणि त्रुटींचे निराकरण करणे — ही सर्व कामे WP-CLI द्वारे वेगाने आणि अचूकपणे कशी करता येतात, याचे प्रत्यक्ष उदाहरणांसह प्रात्यक्षिक दिले जाणार आहे.
हे सत्र पूर्णपणे बिगिनर-फ्रेंडली असून कोणत्याही प्रगत कोडिंगची आवश्यकता नाही. प्रत्यक्ष प्रॉडक्शन वातावरणातील उदाहरणांमधून लहान WP-CLI सवयी कशा प्रकारे कामाचा वेग वाढवतात, चुका कमी करतात आणि वर्डप्रेस वातावरणावर अधिक नियंत्रण मिळवून देतात, हे साजिद अन्सारी स्पष्ट करणार आहेत.
नवोदित डेव्हलपर्स, फ्रीलान्सर्स, विद्यार्थी आणि कमांड-लाइन कौशल्ये सुधारू इच्छिणाऱ्या प्रत्येकासाठी हे सत्र अत्यंत उपयुक्त ठरणार आहे. सहभागी या सत्रातून लगेच वापरता येतील अशी सोप्या, उपयुक्त आणि व्यवहार्य साधने घेऊन जाणार आहेत.
यशवर्धन राणा करणार छोट्या एजन्सींच्या शाश्वत वाढीवर मार्गदर्शन
फ्रीलान्सर्स आणि लहान डिजिटल एजन्सींसमोरील वाढीच्या (Growth) आव्हानांवर प्रकाश टाकणारे विशेष सत्र वर्डकॅम्प कोल्हापूर २०२६ मध्ये आयोजित करण्यात आले आहे. “From Random Clients to Repeatable Growth: What Small Agencies Should Focus on in 2026” या विषयावर कंटेंट मार्केटिंग आणि रणनीती तज्ज्ञ यशवर्धन राणा उपस्थितांना मार्गदर्शन करणार आहेत.
यशवर्धन राणा हे जवळपास दहा वर्षांचा अनुभव असलेले कंटेंट मार्केटर व स्ट्रॅटेजिस्ट असून, त्यांनी अनेक नामांकित वर्डप्रेस कंपन्यांसोबत काम करत सेंद्रिय (Organic) मार्केटिंग, गुणवत्तापूर्ण ट्रॅफिक, वापरकर्ता एंगेजमेंट आणि दीर्घकालीन महसूल वाढ साध्य करण्यासाठी मोलाचे योगदान दिले आहे. शाश्वत आणि नातेसंबंधांवर आधारित मार्केटिंग पद्धती ही त्यांच्या कामाची खास ओळख आहे.
गेल्या आठ वर्षांहून अधिक काळ ते Make WordPress प्रकल्पात सक्रिय योगदान देत असून, जागतिक तसेच स्थानिक पातळीवर वर्डप्रेस समुदाय उभारण्यात त्यांची महत्त्वाची भूमिका राहिली आहे. मध्य प्रदेशातील भोपाळ येथे वर्डप्रेस समुदायाची जडणघडण आणि वाढ करण्यात त्यांनी विशेष योगदान दिले आहे. विविध वर्डकॅम्प्समध्ये त्यांनी वक्ता म्हणून सहभाग घेतला असून, कंटेंट स्ट्रॅटेजी, युजर इंटेंट आणि ग्रोथ सिस्टीम्स यांवर आधारित व्यावहारिक अनुभव ते शेअर करत असतात.
सध्या यशवर्धन राणा हे GoDaddy येथे असोसिएट मार्केटिंग मॅनेजर म्हणून कार्यरत असून, डिजिटल प्रेक्षकांची सखोल समज आणि नाविन्यपूर्ण मार्केटिंग तंत्रांच्या साहाय्याने स्टार्टअप्स तसेच प्रस्थापित ब्रँड्सना बदलत्या ऑनलाइन वातावरणात यशस्वीपणे पुढे नेण्याचे काम करत आहेत.
या सत्रात ते सांगणार आहेत की, बहुतेक फ्रीलान्सर्स आणि छोट्या एजन्सी रेफरल्स, ओळखी आणि योगायोगाने मिळणाऱ्या क्लायंट्सवर अवलंबून वाढतात. यामुळे काम सातत्याने मिळत असले तरी क्लायंट पाइपलाइन अनिश्चित राहते आणि वाढीचे नियोजन करणे कठीण होते. या पार्श्वभूमीवर, उच्च कामगिरी करणाऱ्या एजन्सीज सातत्यपूर्ण वाढ कशी साध्य करतात, याविषयीच्या अलीकडील उद्योग संशोधनावर आधारित निष्कर्ष या सत्रात मांडले जाणार आहेत.
सैद्धांतिक चर्चा किंवा गाजावाजा टाळून, हे सत्र नातेसंबंध, योग्य पोझिशनिंग आणि फॉलो-अप सिस्टीम्स यांवर आधारित सोप्या आणि प्रत्यक्ष अंमलात आणता येतील अशा उपायांवर केंद्रित असेल. कोणताही अतिरिक्त प्रक्रिया भार न वाढवता, छोट्या टीम्स या पद्धती कशा वापरू शकतात, याचे स्पष्ट मार्गदर्शन या सत्रात मिळणार आहे.
या सत्रातून सहभागी २०२६ साठी स्पष्ट प्राधान्यक्रम, वाढीतील सामान्य चुका टाळण्याचे उपाय आणि ‘रॅंडम क्लायंट्स’कडून योजनाबद्ध व पुनरावृत्तीक्षम (Repeatable) वाढीकडे कसे वळावे, याची दिशा घेऊन जाणार आहेत.
फ्रीलान्सर्स, २ ते ५ जणांच्या डिजिटल एजन्सीज, कंटेंट स्ट्रॅटेजिस्ट्स आणि व्यवसाय वाढीचा विचार करणाऱ्या प्रत्येकासाठी हे सत्र अत्यंत उपयुक्त ठरणार आहे.
रिमोट वर्कमधील समतोलावर प्रथमेश पालवे यांचे मार्गदर्शन
रिमोट वर्कमुळे मिळणारे स्वातंत्र्य आणि त्याचबरोबर उद्भवणारी मानसिक व कौटुंबिक आव्हाने यांचा समतोल कसा साधावा, यावर मार्गदर्शन करणारे महत्त्वाचे सत्र वर्डकॅम्प कोल्हापूर २०२६ मध्ये आयोजित करण्यात आले आहे. “The Remote WordPress Worker’s Playbook: Focus, Family, and Finding Balance” या विषयावर अनुभवी प्रोजेक्ट मॅनेजर आणि टीम लीड प्रथमेश पालवे उपस्थितांना मार्गदर्शन करणार आहेत.
प्रथमेश पाळवे हे वर्डप्रेस परिसंस्थेतील विविध उपक्रमांमध्ये सक्रिय असलेले अनुभवी व्यावसायिक असून, सध्या ते CampusPress आणि Edublogs येथे जागतिक पातळीवर वितरित वर्डप्रेस सपोर्ट टीम्सचे नेतृत्व करत आहेत. शिक्षण क्षेत्रातील मोठ्या संस्थांसाठी अत्यावश्यक पब्लिशिंग प्लॅटफॉर्म्स सुरळीतपणे चालविण्याची जबाबदारी त्यांच्या टीमकडे आहे.
वर्डप्रेस समुदायाचे सक्रिय सदस्य असलेल्या प्रथमेश पालवे हे वर्डप्रेस ठाणे मीटअपचे सह-आयोजक असून, विविध वर्डकॅम्प्स आणि स्थानिक तांत्रिक कार्यक्रमांमध्ये ते नियमित योगदान देतात. आरोग्यदायी रिमोट-वर्क पद्धती, शिस्तबद्ध वर्कफ्लोज, वैयक्तिक आयुष्य आणि व्यावसायिक जबाबदाऱ्या यांचा समतोल साधणे, तसेच रिमोट टीम्सना केंद्रित, जोडलेले आणि समाधानकारक कामकाजासाठी सक्षम करणे, याबाबत त्यांना विशेष आवड आहे.
या सत्रात प्रथमेश पालवे रिमोट वर्कमधील प्रत्यक्ष अनुभव आणि शिकवण शेअर करणार आहेत. रिमोट कामामुळे अनेक वर्डप्रेस व्यावसायिकांना मिळालेले स्वातंत्र्य जरी महत्त्वाचे असले, तरी घरातील सततचे व्यत्यय, काम आणि वैयक्तिक आयुष्यातील धूसर सीमा, तसेच एकाग्रता टिकवण्याची कसरत ही मोठी आव्हाने असल्याचे ते अधोरेखित करतात.
व्यक्तिगत अनुभवांवर आधारित कथा आणि उदाहरणांच्या माध्यमातून ते शांतता व सातत्य वाढवणाऱ्या सवयी, बर्नआऊट न होता उत्पादक राहण्याचे मार्ग, तसेच काम आणि वैयक्तिक वेळेचे संरक्षण करणाऱ्या स्पष्ट सीमारेषा कशा आखाव्यात, यावर प्रकाश टाकणार आहेत. सकाळच्या सवयींपासून ते संध्याकाळच्या डिजिटल डिटॉक्सपर्यंत दिवसाची जाणीवपूर्वक रचना कशी करावी, आणि छोट्या-छोट्या दैनंदिन शिस्तीमुळे दीर्घकालीन यश आणि समतोल कसा साधता येतो, याचे मार्गदर्शन या सत्रात मिळणार आहे.
फ्रीलान्सर्स, टीम मॅनेजर्स किंवा संस्थेसाठी रिमोट काम करणाऱ्या प्रत्येकासाठी हे सत्र उपयुक्त ठरणार आहे. गोंधळातही स्पष्टता मिळवणे आणि रिमोट वर्कच्या दैनंदिन लयीत पुन्हा आनंद शोधण्याची दिशा हे सत्र देणार आहे.
सुनील कुमार शर्मा यांचे वर्डप्रेस प्रशिक्षण कार्यक्रमावर मार्गदर्शन
वर्डप्रेस शिकण्यासाठी प्रेरित करणारे आणि प्रशिक्षणाबाबत मार्गदर्शन करणारे सत्र वर्डकॅम्प कोल्हापूर २०२६ मध्ये आयोजित केले जाणार आहे. “Why I started a WordPress Training Program” या विषयावर अनुभवी वर्डप्रेस डेव्हलपर, वक्ता, कंटेंट क्रिएटर आणि समुदाय स्वयंसेवक सुनील कुमार शर्मा सहभागींसमोर आपले अनुभव आणि दृष्टिकोन मांडणार आहेत.
सुनील कुमार शर्मा हे WPSimplified संस्थेचे संस्थापक आहेत. येथे ते वर्डप्रेसच्या संकल्पना सोप्या पद्धतीने समजावून सांगण्यासाठी कंटेंट, ट्युटोरियल्स आणि प्रत्यक्ष समुदायात सहभाग यावर लक्ष केंद्रित करतात. जवळपास दहा वर्षांचा वर्डप्रेस अनुभव असून, त्यांनी अनेक समुदाय प्रकल्पात योगदान दिले आहे.
या सत्रात सुनील कुमार शर्मा सांगणार आहेत की, अनेकांना वर्डप्रेस शिकण्यात भाषा, अनुभवाची कमतरता किंवा थेट प्रशिक्षण मिळवण्याची अडचण येते. या कार्यक्रमाची उद्दिष्टे आणि त्यामागील दृष्टीकोन, तसेच प्रशिक्षणातून सहभागी कोणते महत्त्वाचे फायदे आणि शिकण्याच्या संधी मिळवू शकतात, हे त्यांनी स्पष्ट केले आहे.
सत्राद्वारे सहभागी वर्डप्रेस शिकण्याच्या अडचणी ओळखणे, सोप्या पद्धतीने शिकण्याचे मार्ग आणि समुदायाशी संवाद साधण्याचे फायदे समजू शकतील.
नागेश पै यांची WooCommerce कार्यशाळा
लहान-मोठ्या व्यवसायांसाठी ऑनलाइन स्टोअर तयार करण्यास मार्गदर्शन करणारी WooCommerce कार्यशाळा वर्डकॅम्प कोल्हापूर २०२६ मध्ये आयोजित केली जाणार आहे. या सत्राचे मार्गदर्शन अनुभवी फ्रीलान्स वर्डप्रेस आणि WooCommerce डेव्हलपर नागेश पै करणार आहेत.
ठाण्यातील नागेश पै यांनी २००८ मध्ये वर्डप्रेससह त्यांच्या कारकिर्दीची सुरुवात केली आणि एका समुदाय वेबसाइटवर काम करण्यास प्रारंभ केले. त्यांनी फ्रीलान्सिंगमध्ये पाच वर्षे काम केले, तर ऑटोमॅटिकमध्ये आठ वर्षे सॉफ्टवेअर डेव्हलपर आणि सपोर्ट इंजिनीअर म्हणून काम केले. शिवाय, त्यांनी मुंबईतील विविध बिझनेस स्कूलमध्ये नऊ वर्षे अतिथी प्राध्यापक म्हणून मार्गदर्शन केले आहे. त्यांच्या आवडींमध्ये संगीत आणि सध्या 3D प्रिंटिंगचा समावेश आहे.
या कार्यशाळेत सहभागी WooCommerce वापरून सोपी स्टोअर वेबसाईट कशी तयार करावी, त्यातील मूलभूत वैशिष्ट्ये आणि संबंधित संज्ञा समजून घेणे, तसेच भविष्यात स्वतःचा स्टोअर तयार करण्यासाठी किंवा विद्यमान स्टोअर प्रभावीपणे व्यवस्थापित करण्यासाठी आवश्यक कौशल्ये मिळवण्यावर लक्ष केंद्रित केले जाईल.
फ्रीलान्सर्स, लहान व्यवसाय मालक आणि वर्डप्रेस/ WooCommerce शिकण्याची आवड असणाऱ्या प्रत्येकासाठी हे कार्यशाळा उपयुक्त ठरणार आहे.
“चला मग, भेटूया वर्डकॅम्प कोल्हापूर २०२६ मध्ये!” 🚀
Discover more from इये मराठीचिये नगरी
Subscribe to get the latest posts sent to your email.
