गुरुपौर्णिमे पर्यंतच्या पाच दिवसात मध्यम ते जोरदार पावसाची शक्यता !

आपल्याही मनात हवामानाविषयी काही शंका असतील. पाऊस, पाणी व शेती संबंधी प्रश्न असतील तर जरूर कमेंटमध्ये लिहा. त्यात आपले नाव व नंबर लिहायला विसरू नका. आपल्या प्रश्नांची अभ्यासपूर्ण उत्तरे देऊ.

माणिकराव खुळे,
जेष्ठ सेवानिवृत्त हवामान तज्ञ, भारतीय हवामान खाते पुणे.
९४२३२१७४९५, ९४२२०५९०६२.

जोरदार पाऊस –

आजपासुन पुढील पाच दिवस म्हणजे गुरुवार दि. १० जुलै पर्यन्त नंदुरबार तसेच मुंबई सह संपूर्ण कोकण व विदर्भातील १९ जिल्ह्यांत आणि जळगांव, धुळे, नाशिक, पुणे, सातारा, कोल्हापूर अश्या ६ जिल्ह्यातील शिरपूर, सिंदखेडा, चोपडा, यावल, रावेर, मुक्ताईनगर, एदलाबाद, सुरगाणा, कळवण, दिंडोरी पेठ, त्र्यंबकेश्वर, नाशिक, इगतपुरी, जुन्नर, लोणावळा, खंडाळा, मावळ, मुळशी, वेल्हे, भोर, महाबळेश्वर, जावळी, पाटण, शाहूवाडी, गगनबावडा, राधानगरी, चंदगड व लगतच्या परिसरात जोरदार पावसाची शक्यता जाणवते.

त्यामुळे घाटावर उगम पावणाऱ्या महाराष्ट्रातील गोदावरी, दारणा, गिरणा, वैतरणा, कश्यपी, कडवा, प्रवरा, भीमा, नीरा, इंद्रायणी, मुळा, मुठा, कुकडी, कृष्णा-कोयना, पंचगंगा, वारणा, दूधगंगा, भोगावती ह्या नद्या पूर-पाण्यासह दुथडी वाहु शकतात.

संपूर्ण मराठवाड्यातील ८ आणि संपूर्ण अहिल्यानगर जिल्हा तसेच जळगांव, धुळे, नाशिक, पुणे, सातारा, कोल्हापूर अश्या ६ जिल्ह्यातील  वर्षच्छायेच्या प्रदेशातील उर्वरित तालुक्यात रविवारपासुन पुढील तीन दिवस म्हणजे मंगळवार दि. ८ जुलै पर्यन्त  मध्यम पावसाची शक्यता जाणवते. तर त्यापुढील २ दिवस म्हणजे बुधवार व गुरुवारी ९ व १० जुलै ला ह्या भागात तुरळक ठिकाणी किरकोळ पावसाची शक्यता जाणवते.

 शुक्रवार दि. ११ जुलै पासुन काहीशी उघडीप, काहीशी रिमझिम, तर मधूनच सूर्यदर्शन अश्या वातावरणाची शक्यता जाणवते.