उन्हाळ्यात सुरू झालेल्या पावसाळ्याने

त्यांनी 
एक कवी संमेलन भरवलय 
अन् मला कविता वाचायला बोलवत आहे
आयोजकांना माहित नाही
इथं माझ्या कवितेची हिरवी ओळ 
अवकाळीत सडत पडलीय..

बागेवर डाऊनी, करपा 
द्राक्षाचा येणारा हंगाम पाण्यात 
वावराचं कुरण झालंय
पेरणीला वाफसा लय लांबची गोष्ट
इथं मशागतीलाच पाऊस सवड देईना..

मळ्यातल्याच शंकर आप्पाची 
नवी खोदलेली विहिर वळवात
दरडी सारखी कोसळली..
त्यांचे काढणीला आलेले कांदे 
वावरातच सडले..
वारकरी आप्पाच्या डोळ्यात 
पहिल्यांदाच पाणी पाहिलं ..

स्वतःच्या.. शेजारच्या ... पाहुण्या रावळ्यांच्या 
कोणत्याही गावाला फोन करून खबर घेतली 
तर उन्हाळ्यात सुरू झालेल्या  पावसाळ्याने 
सोलपटून काढल्याचाच विव्हळ येतो..

अन् ते मला कविता म्हणायला बोलावताय 

त्यांना वेळप्रसंगी 
कवीने घातलेला कुर्ता ,कोट 
या सोबत 
त्याच्या काळजावरच्या 
जखमा सुद्धा दिसायला हव्यात..

- संदीप जगताप,
चिंचखेड ता. दिंडोरी, जि. नाशिक 
संपर्क - 7218625960