July 25, 2024
Manisha Patil Poetry Chehara Harawaleya lekee
Home » चेहरा हरवलेल्या लेकी…
कविता

चेहरा हरवलेल्या लेकी…

चेहरा हरवलेल्या लेकी

मैत्रिणी, बहिणी जाताना
घेऊन जातात
मोगऱ्यांचे ऋतू
आणि जुईसारख्या भावजया
येत राहतात घराघरांत
तेव्हा अवघड असते
एखाद्या लेकीने
त्या गावात जन्मभर राहणे

सन्मानाचा पाहुणचार
क्वचितच भेटतो तिला
ती धरली जाते गृहीत
भावकीच्या हरेक विधीत.

नसतो तिच्या पदरात
माहेरच्या हिरवळीवरचा
दोन दिसाचा विसावा…

आपल्याच माहेरात
मुकी मुकी होते लेक
टाळत राहते
बालपणीचे ओळखीचे चेहरे
जपत राहते
कापऱ्या जिवाला…

आटत जातात
मायेचे उमाळे
आईबापानंतर…
आणि हिरव्यागार झाडाची
एक डहाळी
सुकत जाते अकाली.

अजीर्ण होतात लेकी
ठसठसत राहते
तिचे अस्तित्व
माहेरच्या
बदललेल्या उंबरठ्याला…
वाळवीसारखी
कुरतडत राहते तिला
ही उपरेपणाची सल…

परंपरेच्या धरणभिंतींशी
त्या बांधून घेतात स्वतःला
मन्वंतराची दारे
उघडत नाहीत त्यांच्यासाठी
आणि नाकारताही येत नाहीत त्यांना
समष्टीच्या ऋचा…

उभी हयात
पोपडत राहतात
या चेहरा हरवलेल्या
लेकी

हे कसे
कळत नाही
कुणाला…????

कविता – मनीषा पाटील,
देशिंग-हरोली, जि. सांगली
संपर्क – ९७३०४८३०३२


Discover more from इये मराठीचिये नगरी

Subscribe to get the latest posts sent to your email.

Related posts

शिक्षित लोकप्रतिनीधी ?

उसावरील तपकीरी ठिपके व तांबेरा रोगांचे नियंत्रण

अर्थसंकल्प 2022-23ः शाश्वत कृषी विकासाला समर्पित अर्थसंकल्प

Leave a Comment

श्री अथर्व प्रकाशनचे इये मराठीचिये नगरी हे मिडिया व्यासपिठ आहे. अध्यात्म, शेती, पर्यावरण, ग्रामीण विकास यासह आता पर्यटन, राजकारण, समाजकारण, नवं संशोधन, साहित्य, मनोरंजन, आरोग्य आदी विषयांना वाहून घेतलेले हे न्युज पोर्टल आहे. संपर्कः श्री अथर्व प्रकाशन, 157, साळोखेनगर, कळंबा रोड, कोल्हापूर 416007 मोबाईलः 9011087406 WhatsApp - 8999732685, 9011087406

Discover more from इये मराठीचिये नगरी

Subscribe now to keep reading and get access to the full archive.

Continue reading