दुष्काळ जाहीर करून कोणते प्रश्न सुटले..??

हात जोडत तो म्हणाला,
"साहेब,
सोयाबीन करपली, मका जळाली,
जनावरांना चारा नाही, प्यायला पाणी नाही.
त्याला मिठाचे सुद्धा वांदे झाले,
औषध पाण्यावाचून किती जण मेले?

या रखरखत्या उन्हामध्ये,
कोणीच कोणाला आसरा देइना,
तुम्हापुढे खूप रडावंस वाटतं,
पण डोळ्यामध्ये टिपूस पाणी येइना."

तेव्हा गाडीमध्ये बसताना,
साहेब म्हणाले,
"म्हणूनच आपला तालुका
दुष्काळाच्या यादीत जाहीर केलाय!"

काचा वर झाल्या, सायरन वाजले,
ताफा निघाला, धुळीचे लोट उठले...
त्याला कळलेच नाही,
दुष्काळी तालुका जाहीर करून
नेमके वरचे आपले कुठले प्रश्न सुटले?
नेमके आपले कुठले प्रश्न सुटले?

◾संदीप जगताप, 
चिंचखेड, ता. दिंडोरी,नाशिक
7218625960