प्रभा प्रकाशनाने प्रकाशित केलेल्या ‘बोल अंतरीचे’ काव्यसंग्रहाचा गौरव
कणकवली – के. एस. आय. पब्लिकेशन, इंगळी, कोल्हापूर यांच्या वतीने ४ ऑक्टोबर २०२६ रोजी कोल्हापूर येथे होणाऱ्या ३१ व्या मराठी ग्रामीण साहित्य संमेलनाच्या निमित्ताने साहित्य क्षेत्रात उल्लेखनीय योगदान देणाऱ्या साहित्यिकांना राज्यस्तरीय महात्मा गांधी साहित्य पुरस्कार जाहीर करण्यात आले आहेत.
यामध्ये कणकवलीचे सुप्रसिद्ध कवी सुरेश बिले यांच्या कणकवली प्रभा प्रकाशनने प्रकाशित केलेल्या ‘बोल अंतरीचे’ या काव्यसंग्रहास राज्यस्तरीय महात्मा गांधी साहित्य पुरस्कार जाहीर झाला आहे.
सुरेश बिले हे कणकवलीतील सांस्कृतिक क्षेत्रातील अग्रगण्य कार्यकर्ते आहेत. सध्या ते समाज साहित्य प्रतिष्ठान सिंधुदुर्ग या संस्थेचे प्रमुख कार्यवाह म्हणून साहित्य क्षेत्रात कार्यरत आहेत. यांच्या ‘बोल अंतरीचे’ या काव्यसंग्रहातून सामाजिक जाणीव, मानवी मूल्ये, नातेसंबंध, ग्रामीण जीवन आणि संवेदनशील विचारांचे दर्शन घडते. विविध विषयांना प्रभावीपणे मांडणाऱ्या या साहित्यकृतीचा गौरव म्हणून हा पुरस्कार त्यांना प्रदान करण्यात येत आहे.
हा पुरस्कार वितरण सोहळा ४ ऑक्टोबर २०२६ रोजी कोल्हापूर येथे होणाऱ्या ३१ व्या मराठी ग्रामीण साहित्य संमेलनात मान्यवरांच्या हस्ते करण्यात येणार आहे.या पुरस्काराबद्दल कवी बिले यांचे सिंधुदुर्गच्या सांस्कृतिक क्षेत्रातून अभिनंदन करण्यात येत आहे.
