पिट्सबर्ग, अमेरिका : महाराष्ट्रापासून हजारो किलोमीटर दूर असलेल्या अमेरिकेतील पिट्सबर्गमध्ये मराठी संस्कृतीचा उत्साहपूर्ण जागर झाला. पिट्सबर्ग मराठी मंडळातर्फे आयोजित गणेशोत्सवाचा प्रारंभ १९ सप्टेंबर रोजी हिंदू जैन मंदिरात भक्तिमय वातावरणात झाला. पिट्सबर्ग शहर तसेच परिसरातील विविध उपनगरांतून सुमारे ३५० ते ४०० मराठी बांधव या सोहळ्यासाठी एकत्र आले.
पारंपरिक ढोल-ताशांच्या गजरात आणि लेझीमच्या तालावर गणरायाचे उत्साहात स्वागत करण्यात आले. त्यानंतर विधिवत गणपतीची स्थापना करून आरती करण्यात आली. आरतीनंतर उपस्थित भाविकांसाठी महाप्रसादाचे आयोजन करण्यात आले.
यंदाच्या गणेशोत्सवाचे विशेष आकर्षण ठरले ते ‘गोवर्धन पर्वत गिरिधारी कृष्ण कन्हैया’ या संकल्पनेवर आधारित भव्य देखावा. हा देखावा उपस्थितांचे लक्ष वेधून घेत होता. भारतीय पुराणपरंपरेतील गोवर्धन पर्वताची कथा आधुनिक तंत्रज्ञानाच्या माध्यमातून प्रभावीपणे सादर करण्यात आल्याने भाविक मंत्रमुग्ध झाले.
अमेरिकेतील वास्तव्यातही भारतीय संस्कृती, धार्मिक परंपरा आणि उत्सवांचे जतन करण्याच्या प्रयत्नांचे दर्शन या उपक्रमातून घडले. विशेषतः पुढील पिढीला भारतीय संस्कृतीशी जोडून ठेवण्याच्या दृष्टीने अशा उपक्रमांना महत्त्व प्राप्त झाले आहे.
पिट्सबर्ग मराठी मंडळाचे अध्यक्ष यशोधन डोंगरे यांनी उपस्थितांचे स्वागत केले. कार्यक्रमाच्या समारोपावेळी बृहन्महाराष्ट्र मंडळाचे (BMM) अध्यक्ष राहुल देशमुख यांनी भाविक, स्वयंसेवक तसेच आयोजनासाठी सहकार्य करणाऱ्या सर्वांचे आभार मानले.
पिट्सबर्ग मराठी मंडळाचा गणेशोत्सव पुढील सात दिवस विविध धार्मिक आणि सांस्कृतिक कार्यक्रमांनी साजरा करण्यात येणार आहे. २६ सप्टेंबर रोजी, शनिवारी सायंकाळी गणेशमूर्तीचे विसर्जन करण्यात येणार आहे.
परदेशात राहूनही महाराष्ट्राची संस्कृती, परंपरा आणि उत्सवांची नाळ जपणाऱ्या पिट्सबर्गमधील मराठी समाजाचा हा गणेशोत्सव सांस्कृतिक एकोप्याचे आणि नव्या पिढीपर्यंत भारतीय परंपरा पोहोचवण्याच्या प्रयत्नांचे सुंदर उदाहरण ठरला आहे.
