- २५ ऑक्टोबर रोजी संमेलन; ऐतिहासिक नगरीत मराठीचा जागर
- रंजनादेवी भोईटे स्वागताध्यक्ष, तर मानसी म्हसकर निमंत्रक
मुंबई : कला, संस्कृती, शिक्षण आणि मराठी साहित्याला राजाश्रय देऊन समृद्ध करणारे थोर विचारवंत महाराजा सयाजीराजे गायकवाड यांच्या ऐतिहासिक कर्मभूमीत, गुजरातमधील वडोदरा येथे पहिले ‘सयाजीराजे गायकवाड मराठी साहित्य संमेलन’ रंगणार आहे. अखिल भारतीय मराठी साहित्य परिषदेच्या वतीने हे संमेलन २५ ऑक्टोबर २०२६ रोजी आयोजित करण्यात आले आहे. परिषदेचे राष्ट्रीय अध्यक्ष डॉ. शरद गोरे यांनी ही माहिती दिली.
अखिल भारतीय मराठी साहित्य परिषदेच्या आजवरच्या वाटचालीतील हे २०० वे साहित्य संमेलन असल्याचे सांगण्यात आले. त्यामुळे या संमेलनाला विशेष महत्त्व प्राप्त झाले आहे.
महाराजा सयाजीराजे गायकवाड यांनी आपल्या कारकिर्दीत शिक्षणाचा प्रसार, ग्रंथालयांची उभारणी आणि साहित्य-संस्कृतीच्या विकासासाठी महत्त्वपूर्ण योगदान दिले. मराठी भाषा आणि साहित्यिकांप्रतीही त्यांनी विशेष जिव्हाळा दाखवला. त्यांच्या या ऐतिहासिक कार्याला उजाळा देतानाच गुजरातमधील मराठी भाषक आणि मराठी साहित्याच्या रसिकांना एका व्यासपीठावर आणण्याच्या उद्देशाने या विशेष साहित्य संमेलनाचे आयोजन करण्यात आले आहे.
स्वागताध्यक्ष व निमंत्रकांची निवड
या संमेलनाच्या स्वागताध्यक्षपदी अखिल भारतीय मराठी साहित्य परिषदेच्या गुजरात प्रदेश उपाध्यक्ष रंजनादेवी भोईटे यांची, तर निमंत्रकपदी गुजरात प्रदेश सरचिटणीस मानसी म्हसकर यांची निवड करण्यात आली आहे.
ग्रंथपूजन, ग्रंथदिंडी आणि साहित्यिक कार्यक्रमांची मेजवानी
ऐतिहासिक वडोदरा नगरीत होणाऱ्या या पहिल्या सयाजीराजे गायकवाड मराठी साहित्य संमेलनाची सुरुवात पारंपरिक ग्रंथपूजन आणि ग्रंथदिंडीने होणार आहे. त्यानंतर भव्य उद्घाटन समारंभ, विविध वैचारिक विषयांवरील परिसंवाद तसेच रसिकांना साहित्यिक अनुभव देणारे कविसंमेलन असे विविध कार्यक्रम आयोजित करण्यात आले आहेत.
या संमेलनाच्या निमित्ताने महाराष्ट्र आणि गुजरात यांच्यातील सांस्कृतिक व साहित्यिक संबंधांना आणखी बळ मिळेल, असा विश्वास आयोजकांनी व्यक्त केला आहे. संमेलनाला महाराष्ट्रासह गुजरातमधून मोठ्या संख्येने साहित्यिक, लेखक, कवी आणि साहित्यरसिक उपस्थित राहण्याची अपेक्षा आहे.
