रेडिमेड झालं जगणं
घराघरात मम्मी घुसली
आई बसली वेशीत
गावागावात माॅल आले
भाकर गेली एसीत
मिक्सर, कुकर, गॅसनं
घर डिजीटल झालंय
थालीपीठ, धपाटं, धिरडं
चुलीवरुन डिलिट झालंय
घराघरात घर करुन
पिझ्झा, ब्रेड, बर्गर, डोसा
एव्हरेस्ट, सुहाना, प्रवीण
रेडिमेड हिरवा ठेचा
आता ऐकूही येत नाही
वाटणं, कुटणं, ठेचणं
खणखणीत लोखंडी तव्यावर
झिंगे-बोंबिल भाजणं
पुस्तकात सापडतंय
शेंगुळ्या, भरित, माडगं
दही घुसळणारी उंच रवी
खणीचं खणखणीत गाडगं
गावरान शिवारी दाळदाणा
मुग-मटकी, नागली, वटाणा
कोंबडी, बोकड देशीच
घमघमघाट मसाला कुटाणा
आता सगळेच हायब्रिड
आजारसुध्दा विदेशी
माणूस थेट आयसीयुत
साधी चावली माशी
कवी – शिवाजी सातपुते ९०७५७०२७८९
- ‘अक्षरगौरव’ साहित्य पुरस्कारांची घोषणा; १५ ग्रंथांची निवड
- तंजावर : दक्षिणेत तेवत राहिलेला मराठी संस्कृतीचा दीप ! Tanjavur Maratha Kings and Marathi Culture
- जागतिक आव्हानांमध्ये भारतीय अर्थव्यवस्थेची वेधक कामगिरी ! indian economy performance global challenges 2026
- गुरुकृपेचा स्पर्श झाला की… Discover how the Guru’s grace awakens knowledge and wisdom
- सहज संस्कार घडवणाऱ्या बालकथा : गड्या आपुला गाव बरा
