नागपूर – येथील यशवंत मनोहर प्रतिष्ठानचे यंदाचे पुरस्कार प्रसिद्ध कवी, लेखक हबीब भंडारे ( छत्रपती संभाजीनगर ) यांच्या ‘मृत्यूच्या अनिश्चित सावटाखाली’ या कवितासंग्रहास तर प्रसिद्ध कवी, गीतकार विनायक पवार ( पेण, जिल्हा – रायगड ) यांच्या ‘नामुष्कीचे पिढीजात वर्तमान’ या कवितासंग्रहास जाहीर करण्यात आले आहे. पुरस्काराचे स्वरूप रोख दहा हजार रुपये, स्मृतिचिन्ह, मानपत्र असे आहे.
या अगोदर हे पुरस्कार दा. गो. काळे (शेगाव ), विवेक काटीकर ( पुणे ), भाग्यश्री केसकर ( धाराशिव ), प्रशांत वंजारे ( आर्णी ), अशोक पळवेकर (अमरावती ) यांना मिळाले आहेत. पुरस्कार वितरण आणि या प्रसंगी होणाऱ्या विविध पुस्तकांच्या प्रकाशन कार्यक्रमाच्या अध्यक्षस्थानी दैनिक लोकमत, नागपूरचे संपादक श्रीमंत माने हे राहणार आहेत. तर विशेष अतिथी दैनिक महाराष्ट्र टाइम्स, नागपूरचे संपादक श्रीपाद अपराजित यांच्या हस्ते पुरस्काराचे वितरण होणार आहे. यावेळेस मान्यवरांच्या उपस्थितीत ‘चिंतनपौर्णिमा,’ ‘आसवांची वेल’, ‘बुद्धिवादी सौंदर्याचे संविधान’ या तीन पुस्तकांचे प्रकाशन भारतीय संविधानाचे अभ्यासक प्रा. देविदास घोडेस्वार यांच्या हस्ते होणार आहेत.
पुरस्काराचे वितरण आणि पुस्तक प्रकाशन २६ मार्च २०२६ रोजी सायंकाळी साडेपाच वाजता करुणा भवन, बजाजनगर, नागपूर येथे होणार आहे, अशी माहिती यशवंत मनोहर प्रतिष्ठान, नागपूर यांनी दिली आहे.
