‘किरकोळ अवकाळीचे वातावरण’
आपल्याही मनात हवामानाविषयी काही शंका असतील. पाऊस, पाणी व शेती संबंधी प्रश्न असतील तर जरूर कमेंटमध्ये लिहा. त्यात आपले नाव व नंबर लिहायला विसरू नका. आपल्या प्रश्नांची अभ्यासपूर्ण उत्तरे देऊ.
माणिकराव खुळे,
जेष्ठ सेवानिवृत्त हवामान तज्ञ, भारतीय हवामान खाते पुणे.
९४२३२१७४९५, ९४२२०५९०६२.
महाराष्ट्रात आज मंगळवार दि. १८ ते शनिवार दि. २२ मार्च दरम्यानच्या पाच दिवसात भागपरत्वे दोन ते तीन दिवस ढगाळ वातावरणासहित अगदीच तुरळक ठिकाणी किरकोळ पावसाची शक्यता जाणवते. पावसापेक्षा विजा, वारा व गडगडाटीच्या वातावरणाची शक्यता जाणवते.
मध्य महाराष्ट्रातील खानदेश ते कोल्हापूर सोलापूर जिल्ह्यापर्यंतच्या दहा जिल्ह्यात आज मंगळवार दि. १८ ते गुरुवार दि. २० मार्च दरम्यानचे तीन दिवस तर मराठवड्यातील आठ जिल्ह्यात आज मंगळवार दि. १८ ते शुक्रवार दि. २१ मार्च दरम्यानचे चार दिवस व विदर्भातील अकरा जिल्ह्यात शुक्रवार व शनिवार दि. २१- २२ मार्च दरम्यानचे दोन दिवस ह्या अवकाळी वातावरणाचा परिणाम जाणवेल, असे वाटते.
विशेषतः मराठवाडा, विदर्भ व जळगांव दक्षिण नगर सातारा सांगली सोलापूर ह्या जिल्ह्यात शुक्रवार दि. २१ मार्च ला ह्या वातावरणाचा प्रभाव अधिक जाणवेल असे वाटते.
दरम्यानच्या पाच दिवसात कोकण वगळता उर्वरित महाराष्ट्रात दिवसाच्या दुपारच्या कमाल तापमानात काहीशी घट होवून तापमान सध्यापेक्षा २-३ डिग्रीने खालवेल, असे वाटते.
