मुंबई – 16 ते 18 जून 2026 दरम्यान एनएफडीसी कॉम्प्लेक्स येथे आयोजित 19 व्या मुंबई आंतरराष्ट्रीय चित्रपट महोत्सवाच्या (मिफ) पार्श्वभूमीवर, पुन्हा एकदा वेव्हज डॉक बझारचे आयोजन केले आहे. या उपक्रमाचे हे दुसरे वर्ष आहे.
वेव्ह्स डॉक बझार, हे माहितीपट, ॲनिमेशन आणि लघुपट निर्मात्यांना प्रोत्साहन देऊन, त्यांच्या प्रवासाला गती देण्याच्या उद्देशाने तयार करण्यात आलेले प्रभावशाली व्यासपीठ असून, या एकाच व्यासपीठाच्या माध्यमातून सहयोग, मार्गदर्शन, बाजारपेठ प्रवेश आणि जागतिक प्रसिद्धीच्या संधी उपलब्ध करून दिल्या जातात. दृकश्राव्य माध्यम उद्योगातील प्रस्थापित व्यावसायिक आणि उदयोन्मुख प्रतिभावंतांना एकत्र आणण्याचे उद्दिष्ट ठेवून हे व्यासपीठ आपली दुसरी आवृत्ती घेऊन आले आहे.
याव्यतिरिक्त, वेव्ह्स डॉक बझार, निर्माते, दिग्दर्शक, वितरक, प्रसारक, अर्थपुरवठादार आणि तंत्रज्ञान क्षेत्रातील भागीदारांसाठी एक परिपूर्ण केंद्र म्हणून काम करेल. हे केंद्र निर्मिती आणि वितरणाच्या विविध टप्प्यांवर आधार देईल, तसेच उत्कृष्ट कथाकथनाला प्रोत्साहन देईल, आणि चित्रपट निर्मात्यांना जागतिक प्रेक्षकांपर्यंत पोहोचायला सहाय्य करेल. सहभागींना तज्ञ आणि अनुभवी व्यावसायिकांशी थेट संवाद साधून या उद्योगातील सध्याचे प्रवाह, बाजारातील मागणी, वितरण विषयक धोरणे आणि प्रेक्षकांचा कल याबाबत मोलाचा दृष्टिकोन मिळेल.
वेव्हज डॉक बझारच्या प्रमुख विभागांपैकी एक म्हणजे ‘व्ह्यूइंग रूम’ (व्हीआर). या ठिकाणी पूर्ण झालेले अथवा निर्मितीनंतरच्या प्रक्रियेत असलेले माहितीपट, लघुपट आणि ॲनिमेशन चित्रपट नोंदणीकृत प्रतिनिधींचा समावेश असलेल्या निवडक प्रेक्षकवर्गासमोर प्रदर्शित केले जातील. केवळ निवडक खरेदीदार, प्रोग्रामर, वितरक आणि गुंतवणूकदारांसाठीच उपलब्ध असलेले हे एक सुरक्षित व्यासपीठ आहे.
हे व्यासपीठ चित्रपट निर्मात्यांना वितरणाचे करार निश्चित करणे, सह-निर्माते आणि जागतिक विक्री प्रतिनिधींशी संपर्क साधणे, चित्रपट महोत्सवांच्या संधी शोधणे आणि चित्रपट पूर्ण करण्यासाठी अर्थसहाय्य मिळवणे यासारख्या संधी उपलब्ध करून देते. एका खास तयार केलेल्या प्रणालीद्वारे, खरेदीदार भाषा, कालावधी, निर्मितीचा टप्पा आणि इतर तपशिलांनुसार चित्रपट शोधू शकतील. तसेच, निवडक चित्रपटांचा समावेश ‘व्ह्यूइंग रूम’ कॅटलॉगमध्ये केला जाईल. तो सर्व नोंदणीकृत प्रतिनिधींना पाठवला जाईल आणि कार्यक्रमापूर्वीच ऑनलाइन उपलब्ध करून दिला जाईल.
वर्क-इन-प्रोग्रेस लॅब (डब्ल्यूआयपी), ही विशेषतः ‘रफ-कट’ अवस्थेतील माहितीपट आणि ॲनिमेशन चित्रपटांसाठी तयार करण्यात आली आहे. बंद दाराआड आयोजित केली जाणारी ही प्रयोगशाळा, निवडक सहभागींना अनुभवी चित्रपट निर्माते, संपादक आणि आंतरराष्ट्रीय मार्गदर्शकांकडून मौल्यवान अभिप्राय, मार्गदर्शन आणि प्रशिक्षण मिळवून देते. यामुळे त्यांना त्यांचे प्रकल्प व्यापक स्तरावरील प्रेक्षकांसाठी अधिक दर्जेदार बनवायला सहाय्य होते. व्हीआर, एआर आणि एक्सआरवर विशेष लक्ष केंद्रित करणारे ‘इमर्सिव्ह मार्केट’, वेव्हज डॉक बझारमध्ये प्रथमच सादर होणार.
वेव्हज डॉक बझार, प्रथमच ‘इमर्सिव्ह मार्केट’ सादर करणार असून, ते इमर्सिव्ह कंटेंट निर्माते, उत्पादक आणि तंत्रज्ञान क्षेत्रातील भागीदारांसाठी समर्पित व्यासपीठ असेल. व्हीआर, एआर, एक्सआर आणि परस्परसंवादी अनुभवांवर लक्ष केंद्रित करणारी ही बाजारपेठ, नाविन्यपूर्ण प्रकल्प प्रदर्शित करण्यासाठी, कथाकथनाचे नवे प्रकार शोधण्यासाठी आणि अर्थपूर्ण सहयोग वाढवण्यासाठी एक व्यासपीठ उपलब्ध करून देईल.
आपल्या गतिमान कार्यक्रमांद्वारे आणि उद्योग-केंद्रित उपक्रमांसह, वेव्हज डॉक बझार, हे माहितीपट, ॲनिमेशन आणि लघुपटांची परिसंस्था बळकट करण्यासाठी सज्ज असून, त्याच वेळी ते सर्जनशील उत्कृष्टता आणि आंतरराष्ट्रीय स्तरावर पोहोचण्यासाठी नवे मार्ग खुले करेल.
वेव्हज डॉक बझार 2026 मधील ‘व्ह्यूइंग रूम’ आणि ‘डब्ल्यूआयपी लॅब’साठी प्रवेशिका स्वीकारणे सुरू होत आहे. माहितीपट आणि ॲनिमेशनपट निर्मात्यांना या उद्योगातील आघाडीच्या व्यावसायिकांशी जोडून देणारे जागतिक व्यासपीठ असलेल्या ‘वेव्हज डॉक बझार 2026’ मधील ‘व्ह्यूइंग रूम’ आणि ‘वर्क-इन-प्रोग्रेस’ लॅबसाठी प्रवेशिका स्वीकारणे सुरू झाले आहे. इच्छुक सहभागी 15 मे 2026 रोजी, भारतीय प्रमाणवेळेनुसार रात्री 11:59 पर्यंत त्यांचे अर्ज सादर करू शकतात.
पात्रता
हा कार्यक्रम जगभरातील माहितीपट आणि अॅनिमेशन चित्रपटांसाठी खुला आहे. वेव्हज डॉक बझार 2026 मध्ये प्रदर्शित करण्यासाठी लघुपट, मध्यम-लांबीचे चित्रपट आणि पूर्ण-लांबीचे चित्रपट पात्र आहेत. चित्रपट पूर्ण झालेले किंवा निर्मितीनंतरच्या टप्प्यावर असावेत, तसेच त्याचे बहुतांश चित्रीकरण आधीच पूर्ण झालेले असणे आवश्यक आहे. विकासाच्या टप्प्यावर असलेले किंवा चित्रीकरणपूर्व प्रक्रियेतील प्रकल्प यासाठी पात्र नाहीत. जे चित्रपट निर्माते आपल्या प्रकल्पांसाठी चित्रपट महोत्सव, विक्री, वितरण अथवा निर्मिती पूर्ण करण्यासाठी आवश्यक निधीच्या शोधात आहेत, त्यांना अर्ज करण्यासाठी विशेष प्रोत्साहन दिले जात आहे. ज्या चित्रपटांना आंतरराष्ट्रीय स्तरावर फारशी अथवा अजिबात प्रसिद्धी मिळालेली नाही, अशा चित्रपटांचे स्वागत आहे
प्रवेशिका सादर करण्याची प्रक्रिया
पहिल्या टप्प्यात, अर्जदारांनी पुनरावलोकनासाठी संपूर्ण चित्रपटाची किंवा ‘रफ कट’ची पासवर्ड-प्रोटेक्टेड स्क्रीनर लिंक सादर करणे आवश्यक आहे. निवड झाली, तर चित्रपट निर्मात्यांनी ‘व्ह्यूइंग रूम’साठी किमान 10 मिनिटांचे फुटेज सादर करणे आवश्यक आहे. संपूर्ण चित्रपट सादर करण्यासाठी विशेष प्रोत्साहन दिले जात आहे. अंतिम फाईल्स सुरक्षितपणे अपलोड केल्या जातील आणि त्या केवळ अधिकृत सहभागींनाच पाहता येतील. आपली कला आंतरराष्ट्रीय स्तरावर प्रदर्शित करण्यासाठी आणि माहितीपट आणि ॲनिमेशन उद्योगातील प्रमुख निर्णयकर्त्यांशी जोडले जाण्यासाठी, चित्रपट निर्मात्यांनी या संधीचा लाभ घ्यावा, असे आवाहन आहे.
इच्छुक उमेदवारांनी पुढील लिंकवर आपले अर्ज सादर करावेत.
नियम, अटी, वारंवार विचारले जाणारे प्रश्न, तसेच व्हीआर आणि डब्ल्यूआयपी बाबतची अधिक माहिती येथे उपलब्ध आहे.
इये मराठीचिये नगरी
मराठी साहित्य, संस्कृती, समाज आणि विचारांचे दर्जेदार लेख वाचण्यासाठी आमचे फेसबुक पेज फॉलो करा.
👍 Facebook Page Follow करा
