अर्ज करण्याची अंतिम मुदत : 10 डिसेंबर 2025
नाशिक – मधमाशी पालन क्षेत्रात महाराष्ट्रभर उल्लेखनीय कार्य करणाऱ्या व्यक्ती व संस्थांना सन्मानित करण्यासाठी ‘बसवंत मधुक्रांती-2025’ पुरस्कारांसाठी प्रस्ताव मागविण्यात आले आहेत. यासाठी अर्ज सादर करण्याची अंतिम तारीख 10 डिसेंबर 2025 असल्याचे आयोजकांनी जाहीर केले आहे.
ग्रीनझोन अॅग्रोकेम प्रा. लि. यांच्या उपक्रमातून स्थापन करण्यात आलेल्या बसवंत मधमाशी उद्यान आणि प्रशिक्षण केंद्र यामार्फत गेल्या सहा वर्षांपासून मधमाशी पालनाबाबत जनजागृती आणि प्रबोधनाचे विविध उपक्रम राबवले जात आहेत. याच कार्याचा भाग म्हणून, दरवर्षी राज्यातील मधपाळांना विभागनिहाय पाच पुरस्कार दिले जातात. विदर्भ, मराठवाडा, पश्चिम महाराष्ट्र, उत्तर महाराष्ट्र, कोकण विभाग असे हे पाच विभाग असून याशिवाय, मधमाशी पालन क्षेत्रात लक्षणीय योगदान देणाऱ्या एक संस्थेला आणि एका व्यक्तीला विशेष पुरस्कार देऊन गौरविण्यात येणार आहे.
दरम्यान, दरवर्षीप्रमाणे यंदाही 21 ते 30 डिसेंबर 2025 या कालावधीत ‘बसवंत हनी बी फेस्टिवल’चे आयोजन करण्यात आले आहे. या उत्सवांतर्गत 23 आणि 24 डिसेंबर रोजी राष्ट्रीय स्तरावरील ‘मधुक्रांती परिसंवाद’ होणार असून, त्याच कार्यक्रमात पुरस्कार वितरण सोहळा पार पडणार आहे.
पुरस्कारांसाठी इच्छुकांनी वेळेत अर्ज सादर करण्याचे आवाहन आयोजकांनी केले आहे. अर्ज प्रक्रिया आणि सविस्तर माहितीसाठी मो. 7420014781 या क्रमांकावर संपर्क साधावा.
