नक्षलवाद, गडचिरोली आणि तेथील जीवनशैलीवर आधारित चित्रपट ‘घात’
मराठीतला शोले असा प्रेक्षकांच्या पसंतीला उतरलेला जितेंद्र जोशी आणि सुरुची अडारकर याचा घात हा चित्रपट आता पुन्हा एकदा चर्चेत आला आहे. कारणही तसेच आहे. सुरुची अडारकर हिने या चित्रपटाबद्दल एक पोस्ट केली आहे. त्यात या चित्रपटातील काही छायाचित्रे देत हा चित्रपट साकारणाऱ्या सर्वांचे आभार व्यक्त केले आहे.
बर्लिन फिल्म फेस्टिव्हल गाजवल्यानंतर घात हा चित्रपट प्रेक्षकांच्या भेटीला आला. विदर्भातील दुर्गम भागात या चित्रपटाचे चित्रिकरण झाले आहे. नक्षलवाद, गडचिरोली आणि तेथील जीवनशैलीवर आधारित हा चित्रपट आहे.
या चित्रपटाबद्दल सुरुची म्हणते की, या कलाकृतीचा एक भाग होणं, हे माझ्या आयुष्यातल्या सगळ्यात जिव्हाळ्याच्या अनुभवांपैकी एक ठरलं. सुरुवात होताच जाणवलं की हा अनुभव वेगळा असणार आहे. कथेच्या प्रत्येक शब्दात, प्रत्येक माणसात, आणि प्रत्येक क्षणात एक हृदयस्पर्शी सहजता जाणवली. या चित्रपटाने मला खूप काही दिलं—शिकवण, आत्मविश्वास, आणि एका सुंदर टीमसह काम करण्याचा अनुभव. मला माझा परीघ वाढवता आला. इतक्या समर्पित, प्रेमळ आणि प्रेरणादायी लोकांमध्ये राहून मी खूप काही शिकले. या चित्रपटाने मला माणूस म्हणून समृद्ध केलं. त्यासाठी मी मनापासून आभारी आहे. हा चित्रपट साकारण्यात हातभार लावणाऱ्या प्रत्येकाला धन्यवाद. आणि ज्यांनी वेळ काढून तो पाहिला, त्यांचेही मनापासून आभार.
सुरुची या पोस्टने या चित्रपटाबद्दल पुन्हा एकदा उत्सुकता निर्माण केली आहे. घात या चित्रपटात विदर्भातील अनेक कलाकार आहेत. त्यांनी त्यांची भूमिकांना अत्यंत प्रामाणिकपणे जिवंत केल्या आहेत. दिग्दर्शकाने मोठे धाडसी पाऊल उचलत गडचिरोलीच्या जंगलात याचे चित्रिकरण केले आहे. यात त्यांना अनेक गोष्टींचा सामना करावा पण या धैर्यामुळे मराठी सिनेमाला निश्चितच एक नवी दिशा मिळाली आहे. घात हा एक प्रेरणादायी चित्रपट आहे.
