शिवाजी सातपुते यांचा गोफणगुंडा
कुठे आहे महाराष्ट्र माझा
सत्ता येते सत्ता जाते, सत्तेची लुटू नका मजा रं
अरे, चांडाळांनो ! कुठे नेऊन ठेवला महाराष्ट्र माझा रं
गुण्या गोविंदाने नांदत होता
फाटलेली माणुसकी प्रेमाने सांधत होता
विस्कटलेलं घर नव्या जोमानं बांधत होता
पावसाने दिला दगा तरी शेतकरी होता राजा रं
अरे, चांडाळांनो ! कुठे नेऊन ठेवला महाराष्ट्र माझा रं
शिवबाची शान होती
संविधानाची आण होती
झुकला नाही दिल्लीपुढे
ताठ आमची मान होती
बेनकाब लाचारी हिसाब तुमचा ताजा रं
अरे, चांडाळांनो ! कुठे नेवून ठेवला महाराष्ट्र माझा रं
महागाईने गाठला कळस
सुकला संसाराचा डेरेदार पळस
फोकाफोकी फार झाली
तुमच्या वागण्याची आली साऱ्यांना कीळस
राजकीय तमाशात झिंगाट वाजतोय बाजा रं
अरे, चांडाळांनो ! कुठे नेवून ठेवला महाराष्ट्र माझा रं
शिवाजी सातपुते ९०७५७०२७८९
