महाराष्ट्र साहित्य परिषदेच्या सोलापूर शाखेकडून विविध पुरस्कारासाठी पुस्तके पाठविण्याचे आवाहन

सोलापूर ः महाराष्ट्र साहित्य परिषद यांच्या सोलापूर शाखेच्या वतीने मराठी साहित्यातील उत्कृष्ट साहित्यकृतींना दरवर्षीप्रमाणे यंदाही विविध साहित्य पुरस्कार प्रदान करण्यात येणार असल्याची घोषणा करण्यात आली आहे. कविता, कथा, कादंबरी, ललितगद्य, अनुवादित साहित्य तसेच चरित्र/आत्मचरित्र या साहित्य प्रकारांतील उत्कृष्ट पुस्तकांचा पुरस्कारासाठी विचार केला जाणार आहे.

यंदाच्या पुरस्कारांमध्ये प्रसिद्ध लेखिका विजयाताई जहागीरदार स्मृती साहित्य पुरस्कार उत्कृष्ट कवितासंग्रहासाठी, कै. सौ. निर्मलाताई उत्तरेश्वर मठपती स्मृती साहित्य पुरस्कार उत्कृष्ट कथासंग्रहासाठी, प्राचार्य कै. डॉ. मधुकर कृष्णाजी झांबरे स्मृती साहित्य पुरस्कार ललितगद्य साहित्यकृतीसाठी, हॉटेल सूर्या एक्झिक्यूटिव्ह उत्कृष्ट साहित्य पुरस्कार अनुवादित साहित्यकृतीसाठी, श्रीमती कमला श्रीवल्लभ चंडक स्मृती साहित्य पुरस्कार उत्कृष्ट कादंबरीसाठी तर कै. ज्ञानोबा काळे व कै. सौ. हौसाबाई ज्ञानोबा काळे स्मृती साहित्य पुरस्कार चरित्र किंवा आत्मचरित्र या साहित्यप्रकारासाठी दिला जाणार आहे.

प्रत्येक पुरस्काराचे स्वरूप रोख रुपये पाच हजार, सन्मानपत्र, शाल व श्रीफळ असे असणार आहे. पुरस्कारासाठी पाठवण्यात येणारी पुस्तके १ जानेवारी २०२५ ते ३१ डिसेंबर २०२५ या कालावधीत प्रकाशित झालेली असावीत. लेखकांनी कोणत्याही एका साहित्य प्रकारातील पुस्तकाच्या दोन प्रती ३० जून २०२६ पूर्वी पाठवाव्यात. पुस्तकाच्या मुखपृष्ठ, मलपृष्ठ किंवा पहिल्या पानावर कोणतीही नोंद अथवा मजकूर लिहिलेला नसावा, अन्यथा पुस्तक अपात्र ठरविण्यात येईल. पुरस्कारासाठी पुस्तकांच्या दोन प्रती किशोर चंडक, कार्याध्यक्ष, महाराष्ट्र साहित्य परिषद, सोलापूर शाखा, मंत्रीचंडक कार्यालय, जवाहरलाल नेहरू वसतिगृह, पार्क चौक, सोलापूर – ४१३००१ या पत्त्यावर पाठवाव्यात, असे आवाहन करण्यात आले आहे.

अधिक माहितीसाठी अध्यक्ष प्रा. डॉ. श्रुती वडगबाळकर (९३२५०४६४१५) तसेच प्रमुख कार्यवाह डॉ. नरेंद्र काटीकर (९४२२६४४२४६) यांच्याशी संपर्क साधावा.